Prome minister demisionario Evelyn Wever-Croes ayera mainta a ofrece un conferencia di prensa na unda e topico di Stichting Sportsubsidie Aruba (SSA) ta sigui keda como un tema relevante, den esey, el a splica cu declaracion di parlamentario Marisol Tromp riba esaki “ta carece di seriedad.”

Prome minister a sigura cu minister Endy Croes a inform’e tocante iregularidad cu tabata tumando luga y cu mesora a cuminsa un investigacion. Despues cu e investigacion a finalisa a entrega un keho pa loke ta malversacion di fondonan.

“Ta trata di un persona cu den area di deporte a pone e confiansa den dje, un persona cu debi na su estudio financiero na universidad y e preparacion riba e tereno di deporte, nan a pensa cu e lo ta e miho persona pa e funcion cu bo por a confia cune,” el a bisa.

Manera ta conoci, e persona aki ta cercano na prome minister pero manera e ta indica “esey no tabatin nada di haber, mi por a hasta bisa cu ora di tuma e decision cu e persona ta ser tuma den servicio, no ta algo cu ta ser consulta cu mi. Lamentablemente e investigacion a duna como resultado cu tabatin cosnan cu a pasa cu no ta bon'” el a sigura.

Prome minister ta keda enfoca cu no solamente pa Gabinete Wever-Croes I y II y vooral pa partido Movimiento Electoral pa Pueblo (MEP) “ta hopi importante pa integridad ta e cos di mas importante, unda cu tin kiebro di integridad tin consecuencianan y esey nos a demostra den 7 aña aki cu nos ta den gobierno.”

Biniendo back riba un declaracion haci pa parlamentario Marisol Tromp, diabierna ultimo e cual segun prome minister ta señala “el a bay crea un impresion manera cos cu no a entrega un keho y mescos cu Arubahuis pasobra esey ta e reaccion cu mi a duna, lo no a entrega keho y mi ta kere Sra Tromp sea ta lubida hopi lihe of e kier manipula, cualkier di dos e ta algo malo.”

Ademas, prome minister ta sigura cu el a splica pa hopi biaha y a demostra te den Parlamento di Aruba cu na momento cu el a haya sa cu algo por ta pasando cu no ta bon, su mes a bay pidi a pidi Centrale Accountantsdienst Aruba pa haci investigacion administrativo y DRH pa haci un investigacion riba aspectonan disciplinario.

Na momento cu e investigacion ey a caba nan a manda e rapport pa Ministerio Publico haci un oriënterend onderzoek y nan a contesta cu mester entrega keho.

Segun prome minister ta enfatisa, e tin pruebanan unda ta sigura cu e mes a entrega un keho y e caso na e momentonan aki ta den man di husticia “Ministerio Publico ta bezig cune y nos tin cu tende di vocero con e caso ta bayendo pero e carta ta confirma cu mi a entrega keho y cu e caso ta andando.”

Den su opinion, el a trece dilanti cu “si parlamentario Tromp kier bisa algo y ta hinca cosnan aden cu no ta berdad, pa mi personalmente mi ta haya cu si un hende tin un mensahe pa duna cu e cual Sra. Tromp kier bisa algo y e ta mescl’e cu mentira, e ta daña e balor di loke e ta trece dilanti. Ta importante pa nos corda cu net Marisol Tromp ta e politico mas deshonesto cu nos conoce. Pasobra e ta unico politico cu tabata sospechoso pa husticia di corupcion pa dos aña y nunca el a admiti ni a informa.” Pa e motibo ey, prome minister ta cuestiona Tromp su declaracion.

Riba e pregunta si lo ta posibel cu minister Endy Croes lo ta envolvi den e caso aki mirando cu parlamentario Tromp a presenta diferente prueba na Ministerio Publico, prome minister a bisa cu lo cual el a mira ta “cu lamentablemente minister di Deporte ta un victima den e proceso aki. Mi no por duna mucho informacion pasobra mi no sa kico e investigacion ta duna. Mi no a haya tampoco e rapport pasobra e no mester bin pa mi, e mester bin pa Ministerio Publico, pero mi ta kere cu esaki ta cosnan cu Ministerio Publico tin cu aclaria,” el a comenta.

Tocante e expresion cu “minister Croes ta un victima” prome minister a declara cu “e no a haci nada malo den esaki, pa asina leu cu mi a mi sa, na momento cu el a haya sa cu cosnan iregular a tuma luga, el a tuma accion inmediatamente.”

Ademas, el a sigura cu e no sa ken ta e persona cu a keda encarga cu e investigacion cu a ser haci caminda Stichting Sportsubsidie Aruba ta un fundacion separa di gobierno, ta existi e reglanan di Good Corporate Governance cu prome minister ta aplica un base stricto cu ta pone cu ora tin un fundacion na banda di gobierno of un compania estatal nan no ta mete den esey.

Prome minister a keda para riba e punto cu declaracion di parlamentario Tromp “ta carece di seriedad, bo no por kere un palabra cu e ta bisa na momento cu e ta tira un mentira di Arubahuis den dje, pa ki bo ta tira un mentira den dje? Pasobra bo no ta sigur di loke bo ta papiando,” el a finalisa.