Awe Director di Registro Civil y Censo, mr. Sharin Luidens lo ta den Parlamento pa duna splicacion riba e cambionan proponi pa eleccion 2021. Y Prome Minister Evelyn Wever Croes ta spera cu fraccion di AVP lo ta presente pa haci e preguntanan necesario riba e cambionan aki.

Esaki Prome Minister a bisa den su contestanan na lider di fraccion di AVP Sr. Marlon Sneek kende a manda un serie di pregunta riba e informacion cu Conseho Electoral cu sosten di Registro Civil y Censo kier introduci digitalisacion den proceso di eleccion.

Sr. Sneek tabata kier sa cua tabata motibo cu kier bin cu e cambionan aki, y e contesta di mr. Wever Croes ta cu e ta referi na e reportahe di Registro Civil y Censo cu a keda compila a base di observacionnan di e forma con eleccion 2017 a bay. Den e rapport a sugeri varios cambio pa garantisa independencia di e proceso y mehora eficiencia.

Hefe di Registro Civil y Censo a informa Prome Minister Wever Croes cu el a manda e rapport pa Conseho Electoral tambe y cu e Presidente dr. Glenn Thode a duna sosten na e sugerencianan.

Prome Minister Wever Croes a splica Sr. Sneek cu e problemanan constata tabata den e organisacion y constelacion di Conseho Electoral; e registro di electorado (kiezersregister), metemento di politica den servicio y trabao pa organisa eleccion, conocemento di publico en general, e conocemento di miembronan di e diferente urnanan electoral, e falta di urnanan electoral y un sistema di votacion cu no ta mas di e tempo aki y cu mester keda digitalisa.

Entrega di lista

Diabierna awor ta entrega di lista y segun ley, tur partido mester entrega e lista personalmente y tur candidato riba e lista mester ta presente. Pero den luz di COVID-19, y pa agilisa e trabao, kier trece cambio unda no ta necesario mas pa tur candidato ta presente. Lo por entrega e lista cu un grupo chikito, pa evita aglomeracion. Ademas lo por haci’e e entrega digitalmente, unda ta scan e seyo rekeri.

E intencion ta pa adapta (upgrade) e software Ondersteuning Verkiezing Aruba, OVA, pa permiti cu por pone firmanan digital pa sostene e como ocho (8) partidonan cu mester di sosten formal pa por participa na eleccion na Juni 25 proximo.

Lo digitalisa e registro di electorado, esta e kiezersregister y cada persona cu derecho di voto, lo haya un codigo, un QR code, riba su carchi di voto, pa asina facilita e proceso. Y lo simplifica e stembiljet, Prome Minister a sigui splica.

Segun Evelyn Wever Croes na e lider di fraccion di AVP, no mester mira e adaptacionnan proponi como cambio den e sistema di votacion na Aruba, sino mas bien cu ta introduci medionan di sosten pa facilita e sistema actual.

Partido mas grandi

Lider di fraccion di AVP Marlon Sneek a puntra Prome Minister si no tabata miho pa a consulta cu e partido mas grandi di eleccion 2017, prome cu a bin cu e proposicion di cambionan den e sistema di votacion, di forma cu por haya un sosten amplio pa nan.

Riba e punto aki, mr. Wever Croes a bisa cu netamente a traha pa crea un plataforma mas amplio posibel. Y ta pa e motibo ey mes cu Director di Registro Civil y Censo hunto cu Direccion Legislativo y Asuntonan Huridico, DWJZ ta siguiendo un proceso pa regla e adaptacion of agregacion na e Ley di Eleccion. A manda e proposicionnan pa medionan di sosten pa eleccion na DWJZ. Consecuentemente, DWJZ a bisa cu por haci uzo di un asina yama Tijdelijke Landsverordening Aanvulling Kiesverordening, esta un ley temporal pa agrega na e Ley di Eleccion.

Pa trece mas claridad, Director di Registro Civil y Censo mr. Luidens lo ta awe tardi na Parlamento pa duna mas splicacion.

Mester bisa cu Parlamento a yama un encuentro publico awe tardi, cuminzando pa 2or di merdia.

E pregunta cu ta keda den laira ta si e Tijdelijke Landsverordening Aanvulling Kiesverordening ta rekeri cu Parlamento mester vota pa acepta esakinan. Segun algun hurista esey ta e caso. Tempo ta cortico mirando cu ya Diabierna mester haci uzo di ley temporario aki pa entrega e lista di cada partido cu kier participa na eleccion 2021, dia 25 di Juni proximo.