Temporada di campaña politico a cuminsa pa algun partidonan manera comunidad por a ripara, esaki ta trece diferente pregunta pa loke ta trata con esey lo tuma luga mirando cu te ainda Aruba ta enfrentando e crisis di pandemia di Covid-19.
Pa cu esaki, prome minister Evelyn Wever-Croes a informa durante su ultimo conferencia di prensa cu dianan pasa e partido di oposicion a haci actividadnan rond di Aruba “sin tene na cuenta cu ningun protocol” y cu e situacion aki ta causa hopi preocupacion p’ey y ta causa hopi dolor.
Como minister presidente el a pidi pa Crisis Team y KPA pa su debido tempo nan lo sinta cu partidonan politico pa por papia con nan lo hiba nan campaña, “esaki no ta e debido tempo ainda, nos ta den pandemia, tur regla ta conta pa partido politico, mesun cos cu pa musico y pa ciudadanonan”, el a sigura.
Tambe a keda treci dilanti diferente pregunta dicon polis no a actua den tipo di casonan aki, na unda nan a mira e aglomeracion di hende dia 18 di maart, mirando cu e dia liber aki hopi ciudadano a sali for di nan cas pa disfruta cu famia of amigonan sin tene na cuenta cu protocolnan di bio-siguridad. Prome minister Evelyn Wever Croes a expresa cu nan no tin e capacidad pa pone polis tur caminda, “nos polis su trabou eigenlijk ta pa combati criminalidad y awo nos tin polis como ‘Covid-Polis’”, el a declara.
Tambe e mandatario a haci un apelacion pa tur e lider politiconan cu esaki no ta e momento pa haci campaña manera ta custuma di haci riba caya, den masa, e reglanan ta conta pa tur hende tambe pa loke ta trata e campañanan electoral, loke ta nifica cu no por haci actividadnan publico.
