Tabata dia 10 di maart cu den Conseho di Minister a trata e Landsverordening Code Corporate Governance. E tempo ey, a traves di un comunicado di prensa, minister di Integridad, Ursell Arends a informa cu Aruba pronto por finalmente bisa cu tin un base legal pa atende cu integridad.
“Durante henter aña pasa, ministerio di Integridad a bin ta traha riba e concepto di ley unda a duna stakeholders activo den compania (semi) publico y esnan interesa e oportunidad pa participa y contribui den e proceso legislativo. Hunto a bin ta desaroya e miho forma pa introduci e ley den practica y awo esaki lo sigui su caminda legal,” e comunicado a señala.
Siman pasa, den un conferencia di prensa di prome minister Evelyn Wever-Croes a bin dilanti e pregunta si tin un texto final tocante Corporate Governance, na unda prome minister a informa cu “tin un maneho den Corporate Governance cu nos a stipula durante tempo cu a mi tabata encarga cu minister di Integridad den mi prome gabinete. Despues ma pasele pa minister Ursell Arends y e cu su expertonan ta hancrando esaki den un ley di Corporate Governance den su proceso. E maneho cu nos tin awor ta stipula e cuadronan dentro di cual mas bien como Gobierno bo ta bisa ‘esaki ta Corporate Governance’ y como Gobierno bo ta keda afo y no por drenta eyden, bo ta laga cada e ora ey e responsabilidad di gobernacion di cada compania estatal den man di esnan cu ta traha eyden. Esey ta Corporate Governance, unda mester tin un limite hopi bon defini kico Gobierno ta haci y kico Gobierno no ta haci; y esey den tempo cu a mi tabata como minister tambe nos a stipula kico ta e perfilnan di personanan cu mester ta como un hunta di comisario, bo mester di un hurista, un accountant y un persona conocedo di e materia, como Energia, por ehemplo y e di cuater persona por ta e persona cu ta rond cu bo por mester di dje y e ministernan ta cumpliendo cu tur e rekisitonan ey”, el a finalisa bisando.
