Nan a wordo aproba pa “advocacy” door di Gobierno Mericano
Diamars ultimo, durante un conferencia di prensa cu a tuma luga na Museum Of Industry San Nicolas,RdA a firma un Letter of Intent cu Quanten Consortium Aruba, pa sigui negocia pa cu reapertura di e refineria. Tambe RdA a firma cu Eagle LNG pa un industria petrokimico. E comision a conseha pa Gobierno no busca solamente un inversionista, sino dos diferente inversionista pa dos diferente inversion.
Durante e conferencia di prensa di diamars, Consulado Mericano, Christian Olson a informa cu Gobierno Mericano ta sostene e consorcio Quanten y e compania Eagle LNG. Nan a wordo aproba pa “advocacy” door di Gobierno Mericano.
“Mi ta contento di mira un interes serio di Gobierno Mericano pa yuda nos reactiva nos economia. Esaki tabata e meta di mi ultimo biahe pa Washington aña pasa. Ademas e ta inspira confiansa y crea perspectiva. Pasobra si tin 1% chens pa crea 2000 cupo di empleo, ta nos deber moral pa explora e 1% ey. Awor ta drenta e fase di negociacion y mi ta spera cu den algun luna nos tin un bon resultado”, Prome Minister a duna di conoce.
Prome Minister a felicita Quanten Consortium Aruba y Eagle cu e paso importante aki y a desea nan exito den e negociacionnan nos dilanti. Quanten y Eagle mes tabata presente na e conferencia di prensa y a contesta tur pregunta y inquietud nan di prensa. Nan a demostra cu nan ta serio den nan intencionnan y p’esey nan a bin Aruba y a indica e seriedad cu nan tin pa sigui cu negociacionnan y cu por ta inversionistanan nobo pa Aruba.
“E hecho cu nan tin sosten di Gobierno Mericano tambe ta mustra e seriedad di e negociacionnan. Pa nos na Aruba cu desde Valero a bay definitivamente na 2013, no tabata tin nada mas riba e tereno ey. Awor tin por lo menos dos compania interesa y nos mester duna un oportunidad. Ami ta optimista y dentro di poco luna nos lo haya sa si nos tin inversionistanan nobo pa San Nicolas”, Prome Minister Evelyn Wever-Croes a expresa.
