Durante un conferencia di prensa diabierna ultimo, prome minister Evelyn Wever-Croes a trece dilanti un actualisacion pa loke ta trata Plataforma Nacional cu ta trata riba e reforma di sectornan di sector publico y recuperacion di economia.

Wever-Croes a splica cu esaki tin e participacion di aproximadamente 125 persona cu ta trahando di forma boluntario pa a atende e tema di recuperacion economico.

Despues cu a wordo traha riba e crisis di salud y e parti humanitario pa loke ta trata esunnan cu a keda mas vulnerabel den comunidad, prome minister a specifica cu nan a cuminsa papia tocante e recuperacion economico. Esaki el a menciona e proyecto Fast Track, cu ta trata di desaroyonan nobo, desaroyonan cu no tabata custuma cune, segun el a sigura.

El a señala cu nan a cuminsa cu e parti di naturalesa pa proteccion di algun area. Despues nan a sigui cu proyecto di infrastructura cu tabata ya caba den planning y cu inversionistanan kier sigui inverti. Aworaki nan ta den finalisacion di e proceso pa por stimula agricultura.

Prome minister a anuncia cu nan a keda cla cu e awa pa agricultornan, a logra reduci e tarifa di awa pa esunnan cu ta cultiva. Di mesun manera a afirma cu e siman aki nan lo presenta esaki na comunidad.

“Den crisis aki, nos a mira cu hopi hende a bay planta y cultiva y esey ta e direccion cu nos kier continua”, el a manifesta.

Di otro banda, el a menciona e parti di e refineria cu e tankinan, pa locual el a bisa cu esey por trece specialmente divisanan cu ta asina tanto necesario.

Ademas, el a enfatisa cu no por bay back den modelo economico anterior y kere cu esey ta yuda pa e pais bay dilanti. Sino mester reevalua strategianan y cada decision cu ta tuma cu mester ta dirigi pa contribui na un economia mas fuerte, mas stabiel.

Aworaki pa loke ta trata e parti di recuperacion economico hunto cu innovacion, e distinto profesionalnan aki di e comision di parti di sector publico, priva, academico y civico ta preparando un master plan, cu tin como meta desaroya crecemento economico den un forma innovativo. Esaki pa no keda depende solamente di turismo. “Nos mester diversifica” el a indica agregando cu tin cu trece solucionnan duradero pa tempo nos dilanti.

E comision ‘Recovery and innovation Committee’ ta trahando riba e vision di un economia transforma, cu aworaki a traha basa riba un pilar so cu ta turismo nan ta transforma esey cu un otro vision, prome minister a finalisa.