Recientemente, Prome Minister Evelyn Wever-Croes, hunto cu Minister di Turismo y Salud, Dangui Oduber tabata na Jacksonville, Florida, pa asina reuni cu ehecutivonan di Jaxport pa firma un MoU pa un ruta nobo di carga entre Aruba y Merca.
Relaciona cu esaki, reportero di Bon Dia Aruba a tuma contacto Prome Minister, Evelyn Wever-Croes cu algun pregunta tocante e acuerdo aki. Primeramente a puntra si tin algun motibo pakico e ministernan encarga cu e carteranan di Economia y Transporte no tabata presente durante e reunionnan na Jacksonville.
Prome Minister a indica cu ayera su persona a firma e MoU cu Jaxport pa explora si por yega na palabracionnan pa traha hunto cu Aruba y como cu e MoU ta trata desaroyo en general di Aruba, como Prome Minister di Aruba e por firma sin problema.
El a remarca cu ta trata cartera di Minister Dangui Oduber cu ta encarga cu APA. APA cu Jaxport ta trahando pa yega na un convenio pa Jaxport yuda APA cu e terminalnan y Minister Dangui Oduber a yega na e acuerdonan ey caba cu Jaxport, y ayera a logra a concretisa esey.
El a sigui splica cu apart di esey, nan kier explora servicio di LNG na wafnan di Aruba pa brinda cruceronan LNG ora nan bin Aruba. Esaki tambe ta cartera di Minister Dangui Oduber, cu tambe tabata presente y p’esey Eagle LNG tambe a firma e MoU.
El a agrega cu lo sigui explora pa habri mas ruta di carga y crucero pa Aruba y negociacionnan ey ta den man di Minister Dangui Oduber.
“Si e palabracionnan aki concretisa, e lo tin beneficio en general pa nos turismo (minister Oduber), energia (minister G Croes), economia (minister Wever), transporte (minister Arends) y finalmente pa caha di gobierno (minister Maduro). E trayectonan aki lo cuminsa awor.
Pues manera bo ta mira, ta trata di varios diferente area di importancia general, cu ta mi ministerio,” Prome Minister a aclaria.
Na mesun momento a puntra si tin division den coalicion, na cual el a sigura esey no ta e caso. “Nos coalicion ta mas fuerte cu nunca. Mi ta referi na djis un ehempel, con minister Arends y ami a representa Aruba na New York siman pasa.”
Pa loke ta trata e servicio di LNG pa barco crucero, a puntra Prome Minister si e ta envolve San Nicolas mirando cu anteriormente no a yega di menciona LNG na Playa, locual lo implica un tubo te na Playa of si crucero cu ta bay mara na San Nicolas so por tuma LNG eynan?
El a splica den su contesta cu manera ta conoci caba, Eagle LNG ta trahando riba un bunkerstation na San Nicolas y e trabounan eynan ta bayendo bon. Segun el a indica, Eagle ta den comunicacion cu habitantenan tambe.
El a aclaria cu no ta bay bin un tubo di LNG pa Playa, pero APA awor a pidi un sorto di tank station na e waf crucero (manera na varios otro pais ta e caso caba) pa nan por brinda e servicio di LNG na cruceronan. Hopi crucero ya caba a bay over na LNG y p’esey e interes di APA den e tank station y pues ya caba APA ta hibando e combersacionnan ey.
