Ayera mainta durante un conferencia di prensa di Prome Minister Evelyn Wever-Croes, e topico cu mas hala atencion tabata tocante CITGO, su trahadonan y e fecha di 30 di januari, riba cual a anuncia e paro completo di e refineria.

Manera el a splica e situacion di refineria, Gobierno di Aruba y CITGO ta negociando un acuerdo di terminacion y suspension. Na october a keda conoci cu tabata den proceso di negociacion y a firma un MoU. Wever-Croes a sigura cu desde cu nan a drenta Gobierno na aña 2017 ‘tabata obvio cu CITGO no por cumpli cu su obligacionnan pa cu e contract cu tabatin desde 2016’.

Despues di un deliberacion, Wever-Croes a comenta cu ‘no tabata facil, tabata hopi dificil pa saca un compromiso di nan cu nan bay cumpli cu e contract’, el a sigura.

Pa via di diferente circunstancia fuera di nan control, ademas di e problemanan na Venezuela, Pdvsa y sancion di Merca y Europa, cada biaha CITGO tabata presenta e plannan ahusta pa con nan ta kere cu nan por cumpli, pero semper nan a tira e responsabilidad riba autoridadnan cu tabata impone sancionnan.

Pa e motibo ey, Wever-Croes a declara cu na mita di e aña aki, el a haci un biahe pa Washington pa e mes reuni cu autoridadnan di OFAC. Di eynan a sali cu CITGO no tabatin e intencion pa continua cu e inversion di refineria y a pidi un licencia pa cera esaki.

Desde e momento ey, a bin un cambio den e postura di Gobierno tambe pa cu refineria y tambe tabata cla cu ‘e unico cos cu lo por ta bon pa Aruba ta e momento cu CITGO bay di berdad’ segun Wever-Croes a sigura.

Wever-Croes a manifesta cu den tur acercamentonan cu tabatin cu nan a trece esaki dilanti, pa motibo cu nan no tin fondo pa paga trahadonan mucho tempo mas y e posicion di Gobierno tabata cu esaki ‘ta totalmente inaceptabel, nan tin cu cumpli cu trahadonan manera cu ley di Aruba ta stipula’, el a expresa.

Di mesun manera, Wever-Croes a señala cu e firma di otro MoU a cuminsa negocia e suspension y terminacion di contract. Di e manera aki nan a haya e permiso pa cuminsa papia cu otro operador – cu primeramente no tabata posibel.

Prioridad di Gobierno ta pa busca un operador serio cu ta cumpli cu palabracionnan, inversion y trahadonan. Pa por logra esaki, Wever-Croes a agrega cu ‘di berdad CITGO lo mester bay’.

Den dianan aki, el a comenta cu ta parce cu nan ta den un fase final di negociacion y acuerdo di suspension y terminacion, manera CITGO a comunica na e 77 trahado cu CITGO a ofrece un pakete di retiro. Pero segun e comunicado, loke a manda pa e trahadonan ta referi na un acuerdo di compromiso cu Gobierno tin pa yega na acuerdo di suspension.

Tocante esaki, el a enfatisa cu ‘Gobierno no tin niun rol, nos no a exigi pa retira niun trahado, ni ofrece nan pakete di retiro, simplemente nos no tin un rol den esey’.

El a expresa cu na a acerca na varios trahado di CITGO y tambe di sindicato, pa sa si Refineria di Aruba (RDA) of Gobierno por tuma e trahadonan over, pero esaki no por sosode. Ni RdA ni Gobierno tin fondo pa haci esaki y tampoco nan ta bay tuma over e refineria. RDA ta no ta doño di e tereno ni ekipo, esey ta huur pa CITGO y ora CITGO entrega e yabi bek, e tereno y ekiponan ta keda den man di RDA manera tabata.

Manera a keda conoci ayera, CITGO a entrega su trahadonan un carta di retiro, den cual ta comunica cu operacion lo caba dia 30 di januari di aña 2020. Wever-Croes a comenta cu e mes no ta forma parti di e negociacion entre sindicato y trahadonan, ‘mi no ta na haltura di esey’ el a declara. Ademas el a recorda cu ta existi leynan na Aruba y e ley di cesantia ta un ley cu no ta bay permiti niun hende pa haci excepcion riba dje, cualkier doño di trabou tin cu cumpli completamente cu e ley di cesantia manera mester ta.

Tocante e fecha di 30 di januari, Wever-Croes a splica cu el a scucha di esaki pa prome biaha siman pasa durante un entrevista cu otro medio, pero e no ta conoce e fecha ey ni e sa si e trahadonan lo bay tuma accion riba esaki.

Ademas, el a comenta cu si CITGO y Gobierno ta yega na acuerdo di suspension y terminacion, e ora ey Gobierno por utilisa e areanan, habri e porta y laga e operador nobo bin.

Ayera a keda conoci cu Sindicato Federacion di Trahadonan (FTA) mediante su presidente Hubert Dirksz a manda un carta cu caracter di urgencia pa Gobierno di Aruba, pa pidi un reunion cu prome minister tocante e punto cu nan no lo acepta oferta di CITGO. Bon Dia Aruba a tuma contacto cu Dirksz y el a duna di conoce cu e reunion no a tuma luga, pa motibo cu prome minister ta wardando un contesta di parti di su conseheronan.

Asina mes, el a manifesta cu trahadonan ta hopi nervioso riba e tema aki y nan hunto cu sindicato ta espera cu awe mes lo por sinta na mesa pa wak ‘con nan por preveni lo pio den sentido di e dañonan cu por haci pa pais Aruba’.