Durante fin di siman tras di lomba Caya Betico Croes a keda ilumina manera cu ta custumber, cu luznan di Pasco y fin di aña. Di e forma aki treciendo e ambiente di celebracion di dianan di fiesta mas cerca di comunidad. Na Dijespies Place, hunto cu Minister Geoffrey Wever, Prome Minister Evelyn Wever-Croes a cende lus di Pasco den Caya Betico Croes.
Prome Minister na e ocasion a gradici cada persona incluyendo DOW, cu a realisa e bunita trabounan, a pesar di contratiempo y responsabilidad nan den cuadro di Covid.
Esaki ta e periodo di mas bunita di aña, e periodo cu nos ta custuma di busca nos propio regalonan cumprando local y di e manera aki, sostene nos comerciantenan local. P’esey den nomber di Gobierno di Aruba, mi ta invita henter comunidad pa pasa sostene comercio y disfruta di un rato agradabel den ambiente di Pasco y fin di aña. Ohala cu e periodo aki por trece hopi alegria y harmonia den e hogar di cada un di nos y cu e por ta un periodo comercial exitoso pa Aruba”, Prome Minister a expresa.
Ta importante pa menciona cu Caya Grandi, Caya Betico Croes ta habri pa vehiculo tambe por core parti atardi despues cu tiendanan cera. Tambe ta invita pueblo pa e anochinan di compras dianan 20-21-22-23 di december di 6.00pm pa 10.00pm cu ambiente di fin di aña. E anochinan aki ta conforme sugerencia y conseho ricibi di Crisisteam.
