Den un conferencia di prensa di ayera mainta, prome minister Evelyn Wever-Croes a confirma cu ta permiti pa campa na sitionan cu tradicionalmente ta conoci pa esaki, pero comunidad mester ta responsabel pa cuida naturalesa y reglanan di Cuerpo Policial

Situacion di COVID ta bayendo bon ainda y ta duna posibilidad pa bay campa, por fin. Sinembargo, Cuerpo di Polis e entidad cu ta encarga pa duna e permisonan pa por campa ainda no a duna un declaracion oficial tocante esaki pa esunnan cu kier solicita un permiso cuminsa haci nan preparacion pa e siman ey di campamento den area specifico di Eagle y Fisherman’s Huts.

Ademas di e confirmacion cu campamento si por tuma luga e aña aki despues di dos aña di pandemia, prome minister a haci e peticion pa cuida beachnan, unda cu algun siman pasa a caba di drecha e beachnan na Arashi, Boca Catalina y Eagle Beach y como tal ta urgi pa cuida y asumi responsabilidad pa cuida e beachnan. “Ta presta, ta presta esakinan.”

E topico aki a bin dilanti pa motibo cu algun personanan cu ta campa pa basta añanan como un forma di tradicion a mustra nan mal contento riba rednan social pa motibo cu algun permisonan a wordo nenga na diferente areanan como por ehemplo, Fisherman’s Huts y Eagle pa via di mal comprendemento riba ley di ROPV cu a drenta na vigor aña pasa.

Den cuadro di esaki mester menciona cu luganan unda hende ta campa tradicionalmente ta cay bou di ‘bestaande situaties’ y ta keda intacto.

ROPV ta pa conserva beach y areanan natural, pero e ROPV tambe ta reconoce actividadnan existente y campamento cu no ta structural y siguiendo e liña aki, campamento  por continua siguiendo e reglanan di Cuerpo Policial y reglanan di Orden Publico manera prome minister a confirma.

“E palabra cu a resalta awe ta responsabilidad, ta momento pa tur hende asumi responsabilidad. Si kier bay campa, awor por pasobra no tin problema di COVID.  Pero tene cuenta pa cuida nos beachnan. Tin famianan cu tin añanan ta campa. Si kier campa otro aña atrobe, ban nos tur carga nos responsabilidad, mantene nos beachnan limpi, no haci nada pa destrui e beach pa yiunan despues por gosa di dje” el a expresa.

E ley ROPV ta pone mas responsabilidad riba ciudadano pa cuida naturalesa, sinembargo pa campamento, e ley no ta stroba e tradicion, particularmente pasobra e no ta structural. Esey ta un di e cambionan crucial y Cuerpo di Polis ta encarga cu orden publico.

Di su parti, Cuerpo di Polis for di siman pasa a manda un comunicado di prensa pa loke ta trata campamento unda nan a indica cu halto comisario interino Irma Gordon a haci un yamada na campadornan pa tene na cuenta cu e condicion bao cual e permiso ta wordo otorga.

Nan a informa cu e fecha riba cual e campadornan por cuminsa campa ta diadomingo 10 april for di 12:00 di merdia, loke ta nifica cu riba e fecha y ora stipula ta permiti pa pone trailernan y tentnan riba e beachnan y tur obheto cu wordo poni prome cu e fecha y ora stipula lo wordo kita pa polis, e ultimo dia di campa lo ta dia 24 april 2022.

Despues di campamento tur obheto mester wordo kita for di e beachnan y si esaki no sosode polis lo kita esakinan riba gasto di e campador cu mester mantene e beachnan limpi y deposita tur desperdicio den bari di sushi of den saconan di plastic.

Prome minister a comenta cu e lo pidi minister Rocco Tjon pa haci un conferencia di prensa y asina splica kico ta bay ta e pasonan pa campamento cu por inclui Eagle y Fisherman’s Huts.

Di su parti, redactor di Bon Dia Aruba a papia cu un campador na unda cu su nomber lo keda anonimo y el a expresa cu nan ta hopi entusiasma cu campamento ta bay tuma luga e aña aki despues di dos aña cu a ser cancela pa motibo di pandemia.

Aunke e area na unda e ta disfruta di e siman aki ta Fisherman’s Huts el a sigura cu ainda nan ta wardando riba un declaracion oficial di Cuerpo di Polis pa asina nan por cuminsa haci nan preparacion cu ta tuma basta tempo, y placa tambe.

El a menciona cu e ta considera campamento algo importante tambe pa turismo y pa e desaroyo economico di Aruba cu na e momentonan aki mester tene na cuenta cune mirando e pasonan di recuperacion economico cu ta tumando luga na Aruba despues di pandemia.

“Nos ta organisa hopi bon, nunca nos a haya un reclamo of un boet pa algo, nos ta mantene e area limpi, nos ta busca nos luga pa pone e bañonan, unda nos lo cushina y asina ey nos ta mantene nos luga pa e tempo aki, tambe turistanan ta bin pa comparti cu nos te hasta nan a yega di come pisca fresco cu nos a yega di prepara, nan ta gosa di e tradicion aki unda cu nos ta spera cu esey lo por continua e aña aki, pa asina yuda nos turismo y economia”, el a finalisa.