Ayera durante un conferencia di prensa di Gobierno, prome minister demisionario, Evelyn-Wever-Croes a comenta tocante e desaroyonan recien entre islanan St. Maarten y Corsou, y Hulanda relaciona cu entidad di reforma Caribense, COHO, y riba e situacion di Aruba.

Tocante e situacion actual pa Aruba, Wever-Croes a comenta: “Nos ta bezig cu Hulanda riba dos trayecto. Uno ta e landspakket t e uitvoeringsagenda pa di tres kwartaal di 2021; anto e otro ta COHO, e leynan di COHO cu tin cu bay via rijkswet.”

Tocante e prome trayecto, el a destaca e momento cu su persona y secretario di estado demisionario pa Asuntonan Interno y Relacionnan di Reino, Raymond Knops, a firma e uitvoeringsagenda di e di dos kwartaal cu nos ta aden aworakinan y tur cos a bay bon. Y aworaki nos ta preparando pa e uitvoeringsagenda di e di tres kwartaal.” El a comenta cu por ta e caso cu ta duna impresion cu no tin progreso of avance den e situacion, pero cu esaki ta pasobra e acuerdonan ta a largo plaso y lo mira desaroyonan a largo plaso. E uitvoeringsagenda henter ta parti den varios pida, y ta evalua ‘kico ta bay awo y kico ta bay despues’.

Nan ta bezig pasobra na juni mester determina e uitvoeringsagenda pa di tres kwartaal, pa asina por bin na remarca pa siguiente tranche di sosten di likides cu Aruba tin mester pa gobierno por sigui cumpli cu su obligacionnan pa e di tres kwartaal di e aña aki. “Segun nos calculonan, nos ta mira cu nos ta recuperando economicamente. April tabata un hopi bon luna pa turismo. Mei tambe ta un bon luna pa turismo. Nos ta mira cu te cu april nos institutonan ta indica cu nos ta recuperando cu 50% caba, esey ta hopi bon. Pero e no ta 100% ainda.” Pa e motibo aki ‘nos ta sigui depende riba e sosten di likides di Hulanda’.

Wever-Croes a destaca cu no ta spera cu lo tin ‘cosnan hopi dificil’ den e di tres kwartaal, pero si ta delibera cu stakeholdersnan pa yega na consenso y palabracionnan pa e uitvoeringsagenda na juni. El a comenta cu, maske su gobierno ta demisionario, nan ta keda maneha e uitvoeringsagenda pasobra e landspakket ta un acuerdo na vigor, y ‘1 di juli e sosten di likides mester t’ey’, pues nan ta keda ehecuta e maneho pa ricibi e sosten necesario ‘pa henter Aruba’.

Tocante COHO, e leynan di COHO y RAFT, ‘nos ta na mesa cu Hulanda, nos ta den negociacion cu Hulanda’. Wever-Croes a comenta cu e negociacion ‘ta bayendo den bon direccion’. “E discusionnan ta riba e temanan. E conseho di Raad van State ta wordo hopi sigui, y nos ta hopi contento di mira esey.” Ainda tin un trayectorio largo pa cana pa e dos leynan aki, segun Wever-Croes, ‘pero nos hendenan ta trahando riba dje, na mesa, pa asina nos por yega na algo’.

Comparando cu situacion na Corsou y St. Maarten, y con e situacion na e islanan ey por pone Aruba sinti nervioso, Wever-Croes a comenta: “No tin motibo pa ta nervioso. Akinan na Aruba nos tin un otro approach pa loke ta trata Hulanda, landspakket y COHO. Nos a bisa, t’anos a bay bati na porta di Hulanda pa haya placa presta, nos a hay’e na cero porciento, y nos a sigui na mesa pa papia di e condicionnan. No ta tur condicion nos ta di acuerdo cune. Pero no kiermen cu bo ta lanta for di mesa bay. Bo ta sigui na mesa, y bo ta purba yega na otro, pasobra na fin di dia ta pueblo di Aruba ta esun cu ta den necesidad.”