Durante e cumbre virtual cu Gobierno a organisa cu hobennan profesional, Premier Evelyn Wever-Croes a splica con fuerte Covid a dal Aruba su economia y su finanzas. Prome cu Covid Aruba tabata bayendo pa un surplus di 40 miyon florin e aña aki. Sinembargo momento cu turismo a cay mesora cu 80%, e surplus aki a cambia den un deficit.

Hopi ta e companianan cu tabata core e riesgo di kibra, y p’esey, segun un comunicado di gobierno, mesora Gobierno a prepara tres proyecto pa yuda nos comerciantenan pa evita consecuencianan mas serio pa tur. E ayudo di Gobierno tabata:
1. subsidio di salario di 60% na tur doño di trabou cu wordo afecta pa e crisis pa asina nan por paga salario di trahadonan.
2. Asistencia financiero FASE na esnan cu perde nan trabou.
3. Ayudo financiero di Afl. 4.000 na empresanan chikito y mediano.

Kico ta e necesidad financiero?
 Director di Finanzas sr. Derrick Werleman a indica cu e problemanan financiero debi na Covid lo no ta e aña aki so, sino otro aña tambe.
E aña aki nos lo mester a marca un surplus di 40 miyon florin pero awor debi na Covid nos ta premira un deficit 1.100 miyon florin debi cu entradanan a cay afo. Gobierno a dicidi di no solamente yuda comerciantenan, manera menciona ariba, pero ademas di carga e deficit di AZV y SVB. Tur esaki ta montantenan hopi grandi y p’esey ta causa e deficit asina grandi.
E deficit aki mester wordo cubri door di busca fiansa. Gobierno a cuminsa busca e fiansa riba mercado internacional pero e mercado a cuminsa cera mesora cu Covid a bira un pandemia local y ta Hulanda so a keda mustra interes pa presta Aruba e placa.
Asina mes Gobierno di Aruba a logra presta un parti di mercado internacional y mercado local y tambe un parti di Hulanda.
Awor falta 682,4 miyon florin ainda y pa esaki mester acudi un biaha mas na Hulanda.
Pa otro aña, 2021, ta premira cu mester di 579 miyon florin pa financia.

Oferta di Hulanda pa yuda refinancia nos debe
 Hulanda den e pakete di condicion, ta ofrece tambe pa refinancia nos debe externo den añanan 2021 y 2022, cu ta 523 miyon florin. Esaki ta duna nos un beneficio di 82 miyon florin riba e debenan aki over di e periodo di 8 aña.

Ademas e ta duna nos como beneficio, cu pa e dos añanan aki, 2021 y 2022, Aruba no mester preocupa pa bay mercado internacional pa presta e placa. Mirando cu e agencianan di rating financiero a downgrade Aruba, e fiansa riba mercado internacional lo no ta facil pa haya. Pues pa dos aña, e ta duna nos un espacio pa reactiva nos economia sin mester preocupa cu mercado internacional. Esaki ta un beneficio grandi di e pakete di ayudo cu Hulanda ta ofrece nos.

Cuanto rosea financiero Aruba tin?
 Segun e directo di finanzas, Aruba tin rosea financiero te mediano di september y despues di esey cosnan lo bay hopi mas malo na Aruba y lo continua den e aña siguiente, te ora turismo ta riba e nivel pre-Covid y esaki lo tuma algun aña. Den e simannan nos dilanti nos mester finalisa e negociacionnan pa asina yega na e fondonan necesario. Nos economia a cuminsa mehora poco poco, pero no na e nivel cu nos ta custuma cune. Y e fondonan ta hopi importante pa cubri e gastonan di Gobierno, pa garantisa cuido di salud, siguridad, enseñansa, AZV, AOV, salario den sector publico y asistencia na sector priva.

Participantenan tabata hopi interesa den e topico aki y tabata tin bastante pregunta. Na final Premier Evelyn Wever-Croes a splica cu ta hopi importante pa nan ta bon informa y a segura nan cu Gobierno di Aruba ta haciendo tur lo posibel pa finalisa e negociacionnan yegando na un formula cu ta den bienestar di tur ciudadano di nos pais.