Mundo ta celebra Dia Mundial di Turismo dia 27 di September. Un dia hopi importante pa Aruba henter para keto na dje siendo Turismo nos pilar economico. Prome Minister Evelyn Wever-Croes den su discurso na e ceremonia y ponemento di krans na Plaza Juancho Yrausquin, a gradici pioneronan den turismo cu a bay laga nos caba y otronan cu ainda ta cu nos, a gradici tur esnan cu ta traha den e sector di brinda servicio na turistanan, y a pone enfasis tambe riba e trabou y maneho di Minister di Turismo, Dangui Oduber.
“Un dia manera awe mi no kier wak atras so, sino reconoce y aprecia e presente tambe. Y awe mi kier reconoce Minister Dangui Oduber, cu tabata tin e cartera hopi dificil di turismo y salubridad publico na momento cu e pandemia Covid 19 a bati na nos porta dos aña y mei pasa. Sin duda, el a lora manga, y cu curashi a carga su responsabilidad riba ambos tereno, dos tereno cu tin biaha hasta tabata tin interesnan conflictivo.
Den e trabou di CrisisTeam, Minister Oduber tabata tin un papel crucial, y tabata tey na tur momento. Tabata su liderazgo cu a pone Aruba tuma decisionnan talves riesgoso di habri frontera como un di e prome paisnan, pero mes momento tabata su vision cu a pone cu nos tabata bon prepara pa esaki. Semper asisti pa ATA.
Y asina Aruba ta marca historia, como un di e paisnan cu ta recuperando economicamente mas lihe y mas fuerte, danki na e recuperacion turistico. Ami ta kere den expresa reconocemento y gratitud, y p’esey awe mi kier den nomber di Gobierno di Aruba y e pueblo di Aruba, gradici Minister Dangui Oduber pa su vision y determinacion”, Prome Minister a expresa.
