Ban uni cu solidaridad pa sigui persevera cu fe, speransa y amor pa nos Pais”

Den su discurso di diadomingo ultimo, Premier Evelyn Wever-Croes a elabora riba e situacion actual di Aruba. Ainda Aruba no a sali completamente di e efectonan di e pandemia, pero e trabou duro, e dedicacion, e disciplina y e determinacion di henter Aruba, ta dunando su frutonan.

“E pandemia mundial, Covid 19, ainda tin su efectonan riba nos pais. Nos no a ni cuminsa sali for di e crisis ey drechi, cu nos a haya nos cu e efectonan mundial di e guera na Ukraina, y e efecto cu esaki tin riba tur prijs na Aruba, especialmente prijs di gasoline. Companianan di utilidad WEB y Elmar tambe a bati na porta cu e prijs internacional di fuel a dal nan duro.

Nos tin nos retonan keto bay pa cu finansas publico, y nan ta preocupante ainda, p’esey e discusionnan cu CAft tin nos atencion completo. Nos ta diferencia di opinion cu CAft principalmente den e conclusion cu Aruba no a haci suficiente, segun CAft, pa baha e déficit. Nos Gobierno di Aruba no ta di acuerdo cu esaki. Esaki por por wordo ilustra a base di e percentage di e deficit di nos GDP.

Prome cu pandemia, 2019, nos tabata tin un presupuesto balansa, hasta un surplus chikito di 4 miyon florin. Aña 2020, e deficit tabata 16% di GDP, debi na Covid-19. Aña 2021, nos a baha e deficit te na 9% di GDP. Aña 2022, nos a proyecta un deficit di 4.6%, y awor nos a logra baha e deficit di e aña aki na mas o menos 2.4%. Pa aña 2023, nos ta proyecta un deficit di 0.6% di GDP.

Pues di un situacion sano prome cu pandemia, pa 16% pa 9% pa 2% pa 0.4%, den apenas 3 aña. Esaki ta resultado di e vision y trabou hopi duro di henter nos pais.

Sinembargo, mi ta sigur cu bo ta di acuerdo cu mi, cu Aruba NO mester di mas crisis na e momentonan aki, Aruba mester wordo brinda un oportunidad husto pa sigui traha y haci loke nos ta haciendo pa sigui progresa y recupera. Esey mester ta e prioridad awor, pa nos cada un yuda otro, pa cada pais den Reino yuda otro.

Ora cu pandemia a dal, nos tabata e pais mas vulnerabel den mundo cu a wordo golpia mas duro economicamente. Nos pueblo a sufri, perdiendo sernan keri y bibando cu menos entrada, sacrificando cu speransa y fe den Dios cu e calamidad aki lo pasa y cu nos lo recupera pronto.

Awe Aruba ta un di e islanan cu mas ta progresando economicamente den Caribe. Pues awor no ta momento pa stroba e progreso aki, ni door di algun Partido of gruponan cu interes scondi den nos comunidad, ni door di ningun hende ni pais.Si nos mira por ehempel e recomendacionnan di CAft, nos ta considera loke CAft ta pidi nos, lo tranca e progreso, lo pone nos dal pasonan atras, pero nos no mester di mas crisis awor. Ya tin crisis di energia y di inflacacion cu a cuminsa afecta nos y henter mundo, debi na e guera di Ukraina. Awor ta momento pa apoya y yuda fortifica e strategia di recuperacion cu Aruba.

Aruba ta marchando padilanti cu optimismo; solo ta saliendo atrobe pa hopi famia cu ta trahando bek, mucha y hobennan contento a caba nan aña escolar y ta gosando di nan vacacion. Aruba ta iniciando e proceso pa bay over na Energia mas limpi y conveniente; esta Gas LNG.

Nos ta pagando e debenan y nos a bahando gasto di Gobierno consistentemente. P’esey awor no ta e momento pa hinca un palo den e spaak di e wielnan di progreso di Aruba, esey lo tranca nos recuperacion.

Mi ta pidi tur ciudadano pa keda positivo. Tambe pa no bay tras di noticia negativo sin verifica prome. Temponnan duro no ta dura pa semper, si nos ta uni cu solidaridad pa sigui persevera cu fe, speransa y amor pa nos Pais.