Gobierno di Aruba tin e honor un biaha mas di ricibi Secretario di Estado sra. Alexandra van Huffelen na Aruba. Durante su bishita cortico, Sra. Van Huffelen lo participa den e conferencia di “Hende Muhe Fuerte” como orador principal, lo reuni cu Prome Minister Evelyn Wever-Croes riba asuntonan pendiente y lo tuma tempo pa scucha e necesidadnan di nos comunidad.
Prome Minister a indica cu su persona hunto cu coleganan Minister, lo reuni cu Secretario di Estado pa por trata diferente temanan cu tin riba agenda incluyendo temanan financiero, temanan di ley di Reino y recorte di salario. “Mi ta aprecia cu e ta bishita nos cu e frecuencia aki, pasobra mi ta convenci cu e ta hopi importante pa e tin un mihor bista riba e asuntonan actual pa e decisionnan cu mester wordo tuma na Den Haag.”
Pa pais Aruba, e bishita frecuente di Secretario di Estado ta importante mirando cu e lo tin un mihor bista di e situacion actual di pais Aruba facilitando asina e proceso di decisionnan cu mester wordo tuma na Den Haag.
“Un bon relacion cu Hulanda ta importante semper y e bishitanan aki ta contribui na un bon relacion. Aruba ta serio, nos ta comprometi cu e plannan di reforma. Aworaki mi ta kere cu tur hende na Aruba ta convenci di e necesidad di e reforma pa nos por para riba nos propio pianan atrobe. Negociacionnan cu Hulanda no semper ta facil pero nos tin cu concentra tambe riba e meta, y e meta ta pa nos para riba nos propio pianan bek. Y si bo concentra riba e meta aki, tur lo demas cu bin na caminda, ta “bijzaak” con tal cu mantene recuperacion di nos pais na prome luga y esey ta algo cu Aruba y Hulanda tin den comun.” Prome Minister termina bisando.
