Ta importante pa preveni y percura pa ta bon prepara
ORANJESTAD – Prome Minister di Aruba Evelyn Wever-Croes hunto cu Bureau Rampenbestrijding, durante di un Conferencia di Prensa extraordinario a anuncia cu Aruba awor ta den un Tropical Storm Warning. E mal tempo cu ta acercando Aruba a desaroya hopi lihe y Crisis Team di Aruba ta keda activa pa por atende cu esaki.
E ultimo informe di Prome Minister Wever-Croes ta, cu e velocidad di e tormenta a aumenta di 25km/ora te na 38km/ora. Manera cu a indica dialuna anochi, tabata spera e tormenta diaranson rond di 8or di anochi, pero considerando e velocidad actual, ta sperando esaki poco mas trempan. E bon noticia den esaki ta, cu si e mantene e velocidad aki, e ta pasa bay mas trempan tambe. Pues ta spera cu pa diaranson rond di 6or di atardi lo por cuminsa sinti e efectonan di e tormenta. Aruba awor ta den codigo orañe y diaranson merdia ta kere cu lo bay den codigo cora, ora cu e tormenta ta mas cerca.
Locual por spera di e pasada di e tormenta
Te cu aworaki por spera cu lo bay tin hopi awasero. Den e caso aki ta pidi pa tur hende ta prepara pa 3 dia di awasero (diaranson, diahuebs y diabierna). E situacion aki por cambia ainda, pero den e caso mas serio, ta papiando di 3 dia.
Un otro hecho ta cu e tormenta aki lo pasa banda pazuid di Aruba, entre Venezuela cu Aruba. E pasada aki ta uno cu no ta custuma cu ne, pues lo bay experiencia otro tipo di resultadonan, Prome Minister a splica.
Tambe ta premira cu den e oranan nos dilanti lama lo bira hopi mas bruto y p’esey ta emiti un ‘small craft warning’. Ta haci apelacion urgente pa tur piscado saca nan boto for di lama.
Departamentonan di Gobierno y scolnan lo cera
Departamentonan di Gobierno aworaki mester bay den estado di preparacion pa e tempestad.
Diaranson merdia 12or, tur empleado di Gobierno lo bay cas pa por atende cu esaki na cas, cu excepcion di departamentonan y/of ekiponan cu mester ta ‘stand-by’ (hefe di departamento ta determina esaki). Scolnan lo ta cera diahuebs y diabierna. E decision aki a wordo tuma teniendo cuenta cu den caso cu e tormenta pasa den curso di diaranson anochi, no ta oportuno pa tur hende ta riba caya diahuebs. Lo cera scolnan diabierna tambe teniendo cuenta cu no sa den ki estado scolnan lo ta y considerando tambe cu ta na fin di aña escolar.
Sector Priva
Ta importante pa menciona cu den codigo oraño manera cu ta aden awor, Gobierno no por impone un decision pa cera companianan den sector priva, den caso di codigo cora si. Sinembargo doñonan di trabou den sector priva ta liber pa sigui ehempel di Gobierno aworaki. Gobierno ta haci apelacion na sector priva pa tene consideracion cu e situacion y nan empleadonan. Si e situacion escala na un codigo cora, eorey si Gobierno por impone e decision riba doñonan di trabou.
Gobierno ta haci apelacion na comunidad pa prepara
Gobierno di Aruba ta moviendo tur ekipo di emergencia na nan postnan designa y ta pidi cada ciudadano pa tuma precaucionnan necesario. Especialmente esnan cu ta biba den casnan cu tin custumber cu ta bay bou awa ora cu awa yobe. Ta pidi pa cuminsa regla cu ta pasa e tormenta na cas di un famia of conocirnan. Ta poniendo extra atencion den area di Madiki, Pos Chikito, Zeewijk y Palm Beach cual ta e areanan cu sa haya hopi molester di awa.
Por ultimo, Prome Minister a enfatisa cu e situacion ta mustra serio, pero semper e situacion por cambia na caminda. Aworaki ta importante pa preveni y percura pa ta bon prepara pa no mester lamenta.
