Den aparato gubernamental no tin un forma uniforme pa evalua empleadonan. Esaki awor a cambia y entrante 1 di januari 2023 Aruba ta conoce un sistema uniforme di evaluacion cu yama “Prestatiemanagement”.
Cu e sistema aki “prestatiemanagement”, por evalua funcionamento di tur empleado y director, y por haci e proceso di promocion cana mucho mas liher. “Un di e metanan pa finansas publico sostenibel y pa Aruba sali di debenan ta, cu e aparato publico mester funciona mas eficiente y mester baha gasto di entre otro personal. E sistema di evaluacion aki ta parti di e proceso”, Prome Minister Evelyn Wever-Croes a indica den un comunicado di prensa.
Sindicatonan a expresa nan preocupacion cu e sistema aki
Prome Minister a traves di un carta ricibi di sindicatonan, a tuma nota di nan preocupacionnan pa cu e sistema aki. Por medio di un carta tambe 22 di december, Prome Minister Wever – Croes a contesta e sindicatonan y elabora riba tur nan preocupacionnan. Ademas a haci un invitacion habri pa nan, den caso cu nan tin necesidad di reuni, sinembargo no a tende nada mas di nan. Mirando cu ainda nan ta expresa di tin preocupacion Prome Minister ta ripiti e invitacion habri aki.
Por ultimo Premier Wever-Croes a bisa: “Nos tin cu tene na cuenta tambe cu e ehempel y e mensahe cu nos kier duna comunidad, nos studiantenan na Universidad, nos generacion di awe y futuro, specialmente den e fase di recuperacion cu nos pais ta aden. Mi ta convenci cu nos tur tin e mesun meta: un aparato gubernamental cu ta funciona bon y den cual derecho di tur empleado publico ta wordo respeta y salvaguardia. Y mi tin tur confiansa cu nos lo logra, si nos traha hunto y cu un actitud positivo,” Wever-Croes a duna di conoce.
