Prome Minister Evelyn Wever – Croes tabata presente na e di 12 congreso di CAROSAI cu a tuma luga e aña aki na Aruba, hustamentente e aña cu Algemene Rekenkamer ta celebra 35 aniversario. Pa cual Prome Minister a gradici CAROSAI pa a organisa e congreso na Aruba y pa apunta Sra. Xiomara Croes-Williams, director di Algemene Rekenkamer Aruba (ARA), como presidente di CAROSAI pa e proximo tres añanan.

Prome Minister Evelyn Wever-Croes den nomber di Gobierno di Aruba a duna pabien na ARA, pa nan trabao eherci y nan dedicacion asistiendo Parlamento di Aruba den e rol democratico cu diferente investigacion. E investigacionnan aki ta yuda Gobierno mehora funcionamento y servicionan na henter comunidad Arubano, Prome Minister a enfatisa. Ademas, rapport di audit di ARA ta di gran balor pa Parlamento, Gobierno y ciudadanonan di Aruba. Como esakinan ta yuda trece mehoracion den gobernacion na beneficio di ciudadanonan. E hecho cu e rapportnan di ARA ta wordo publica, tambe ta promove transparencia.

Premier Wever – Croes na e ocasion a duna un splicacion cortico di e historia di Aruba como un di e paisnan (hunto cu Corsou y Sint Maarten) den Reino, te cu na 1986 ora cu Aruba a ricibi Status Aparte. Prome Minister a enfatisa cu Aruba ta depende hopi riba e sector turistico cual por wordo clasifica como e fuente primordial di entrada pa Aruba. “Desde 2008, Aruba su economia a recupera gradualmente for di diferente recesion y esun mas recien causa pa Covid-19 cu a impacta e fluho di turismo. Pero Aruba ya ta recuperando di esaki, door di a tuma accionnan rapido y decisionnan cu no tur ora tabata facil pa tuma.” Prome Minister a indica, cu aña pasa a cera e aña cu un recuperacion di 72% di turismo. Ta proyecta pa cera e aña aki cerca di 100%, y recuperacion completo pa otro aña.

Metanan di Desaroyo Sostenibel (SDG’s)

Prome Minister Wever – Croes a splica tambe di e agenda global 2030 y metanan di desaroyo sostenibel cual Aruba tambe ta uni na dje conhuntamente cu otro paisnan den Reino Hulandes. “Aruba ta trahando riba adaptacion di e SDG’s na e contexto nacional a traves di e “National Strategic Plan (NSP)” durante e periodo di 2020 pa 2022. July Aruba lo participa na “Voluntary National Review”, y na final lo presenta e status di progreso cu Aruba tin den cuadro di implementacion di SDG’s desde 2017.”

Pa implementa SDG’s e ta esencial pa organisacionnan independiente cu ta duna conseho, ta envolvi cu integracion di SDG’s den nan actividadnan. Esaki ta unda ARA tin un rol central. E responsabilidad cu gobiernonan di cada pais tin, ta duna ARA un rol principal den realisacion di e agenda 2030 door di fortifica e responsabilidad, transparencia y integridad di e gobierno y entidadnan publico. E rol ta conduci na logra obhetivo di desaroyo nacional.

Premier Wever – Croes a agrega bisando cu actualmente ARA mescos cu otro institutonan similar den region, ta conduciendo un audit riba e implementacion di e SDG “Strong and Resilient National Public Health System” (SDG 3.d.)

Gobierno como un stakeholder importante den esaki, ta colaborando den esaki y encurasha otro stakeholders relevante pa tambe forma parti di dje. E resultadonan y recomendacionnan di e audit lo ta un otro “tool” pa yuda den implementacion di SDG’s y prepara Aruba den caso cu bin otro crisis den sector di salud sen futuro.

E importancia di traha hunto riba un isla y cu paisnan den region

E ta importante pa gobierno di Aruba y institutonan manera ARA traha hunto y tin bon comunicacion pa garantisa gobernacion adecua riba e isla. Mescos cu Ministernan y Parlamentarionan ta acerca coleganan den Reino Hulandes, region Caribense y Latino America pa comparti experiencianan y pa posibel colaboracionnan, e ta importante pa ARA haci mescos.

Prome Minister a indica cu e ta importante pasobra haciendo esaki bo ta realisa cu hopi di e paisnan aki ta atende cu retonan similar of tin preguntanan similar. Door di comparti conocemento, experiencia y tips, por yuda otro resolve varios reto sin cu mester re inventa e wiel, Premier Wever – Croes a splica.

Terminando, Prome Minister a gradici tur invitado y participante na e congreso pa nan bishita na Aruba y pa ta presente na e ocasiona special cual ta e di 12 congreso CAROSAI.