Prome Minister Evelyn Wever-Croes, y Director di RdA, Renny Arends a firma e terminacion di contract cu Citgo. E acuerdo tambe a wordo firma pa Minister di Finansa y Minister di Infrastructura.

Cu e terminacion aki, ta habri tambe speransa y oportunidadnan nobo. Prome Minister a duna di conoce cu ta un paso grandi y hopi importante pa reactivacion di economia di pais Aruba. Mas importante, segun Prome Minister ta e oportunidadnan nobo cu a wordo crea, entre otro dos trayecto importante cu lo ta cuminsando. Citgo awo mester paga e debe di impuesto cu ta e suma di 17 miyon dollar.

Prome Minister a indica cu prome cu e paso terminante aki, a tuma luga un negociacion bastante intenso entre Gobierno di Aruba y Citgo pa yega na solucion y conclusionnan. Un negociacion cu sigur no tawata facil na unda cu interes di pais Aruba a wordo defendi y protegi di tur banda.

Parlamento, luna pasa a aproba e ley pa autorisa Gobierno di Aruba pa termina e contract cu Citgo. Negociacionnan despues di esaki a sigui su caminda y awo a yega asina leu cu a firma e contract di terminacion.

“Esaki naturalmente ta duna mi satisfaccion grandi, contento y orguyoso cu porfin awo si e refineria di Aruba ta bek den man di pueblo di Aruba. No tawata facil. Tawata tin momentonan cu nos a kere cu nos lo no bay logra mas tanto debi na e situacion instabil na Venezuela. ”, Prome Minister a expresa.

Tin hopi interes pa lease e tankinan cu tin na San Nicolas. Lo tuma un luna por lo menos pa esun cu bin cu e miho oferta pa pais Aruba haci inspeccion di e tankinan y cuminsa manda e crudo y asina entrada cuminsa drenta cu ta wordo calcula na 4 pa 5 miyon florin pa luna si logra verhuur tur e tankinan.

E di dos trayecto importante ta e reapertura di e refineria of un otro tipo di industria. Esaki lo tuma tur su tempo cu tur transparencia y den consulta. Siendo den crisis mundial, esaki no ta e miho momento pa e refineria, pero esaki lo no bira un obstaculo pa sigui cu e plan pa logra reapertura di refineria pronto.

“Esaki ta un otro luz na horizonte importante pa nos pais. Cu e placa cu ta drenta di e terminacion y e placa di lease di tankinan ta trece entrada y oportunidadnan di trabou nobo pa Aruba y genera economia pa San Nicolas prome pero tambe pa henter Aruba”, Prome Minister Evelyn Wever-Croes a expresa.

Prome Minister a gradici Director di RdA, señor Renny Arends, Hunta di Directiva di RdA, tur miembronan cu a negosha, Departamentonan di Gobierno cu incansablemente a negosha cu Citgo pa yega e terminacion aki cu Citgo.