Ayera mainta. Prome Minister Evelyn Wever-Croes kende tabata bisti cu blusa ros na ocasion di Dia Internacional di Cancer di Pecho a haci un yamado pa ser femenino y masculino evita e malesa aki pa medio di un control regular.
El a declara cu a bisti na ros pa uni na e lucha contra cancer di pecho. E fecha internacional aki a tuma luga dia 19 di october ultimo como un forma pa sensibilisa y conscientisa mundo henter riba importancia di haci test di pecho regularmente.
E mandatario a cita su mes como ehempel bisando cu recientemente el a haci su mammogram como un manera preventivo contra cancer di pecho. El a stimula pa ser femenino haci e test aki, a pesar cu e por resulta nada placentero te hasta un poco doloroso, pero nan como hende muhe ‘por cu mas dolor cu esey.”
El a bisa cu e motibo esencial pa percura detecta e malesa aki na tempo pa medio di control regular ta pa bienestar y felicidad di bo propio famia.
“Pasobra si berdad bo ta stima bo famia, bo mester t’ey pa nan, pa yuda nan den tur loke bo a yuda nan semper,” segun e mandatario. Pero tambe pasobra bo mester stima bo mes. Si bo ta stima bo mes, bo ta dedica tempo na bo salud.
El a cualifica e dia aki como uno “hopi special” pa nos para keto y reflexiona riba e malesa di cancer di pecho. “Un malesa hopi duro cu no ta discrimina,” el a bisa. E ta un fecha tambe cu ta invita nos pa no lubida y reconoce esunnan cu a fayece den e lucha contra e tipo di cancer aki. El a yama nan como ‘guereronan’ cu a lucha duro, pero na final e curpa a cansa.
Pero tambe e ta bira un ocasion pa reconoce esunnan cu ta luchando cu e malesa aki. “Mi ta bisa nan, sigui lucha no give up,” el a declara. E prome mandatario su mensahe tambe a bay pa esunnan cu ta cuida nan sernan keri victima di cancer di pecho, caminda el a manda palabra di danki pa nan dedicacion, amor y cuido.
El a bisa cu e lucha mas efectivo contra e malesa aki ta pa medio di deteccion tempran. E mandatario a conseha pa inspecciona bo mes regularmente. Kiermen haci control cerca dokter pa wak si mester haci mammogram of ecografia, ya cu e ta un practica pa bo mesun bon. Ya cu e deteccion tempran ta haci un diferencia grandi den e mesun tratamento. El a wak esaki den hendenan cerca di dje. “Mas tempran bo detecte mas sigur y efectivo e tratamento por ta,” el a laga sa.
“Sigui lucha, no give up. Na famianan tambe cu ta cuida di nan ser keri, danki pa cuida di nan y sigui duna nan atencion, cuido, specialmente amor y cariño. Awe laga nos cada un compromete di combati cancer di pecho, y e forma mas efectivo ta, deteccion trempan. Deteccion trempan ta aumenta e chensnan di un recuperacion hopi. Mas trempan bo detect’e, mas efectivo y sigur e tratamento lo ta. Y bosa dicon bo mester controla bo mes, pa bo detect’e lihe?”
