Prome minister ta gradici señor knops pa su cooperacion durante 4 aña. Dialuna mainta, den un carta manda na Secretario di Reino demisionario señor Raymond Knops, Prome Minister Evelyn Wever-Croes, den nomber di pueblo di Aruba, ta gradici dhr. Knops, pa su cooperacion di trabou durante e ultimo 4 añanan y especialmente pa e sosten cu el a brinda durante e crisis di Corona. Señor Knops a fungi como Secretario di Reino pa 4 aña y dialuna 10 di januari ta su ultimo dia di trabou. Señora Alexandra van Huffelen lo ta e siguiente Secretario di Reino pa e periodo nos dilanti.
“Aunke cu no semper nos tabata di acuerdo cu otro, nos a traha hunto y cu respet mutuo nos a alcansa logronan importante pa pais Aruba y pa Reino Hulandes. Ainda tur meta no a wordo logra, pero hunto nos a dal stapnan importante pa un Aruba fuerte y resistente. Mi ta desea bo exito den futuro”, tabata palabranan cu Prome Minister di Aruba a expresa na señor Knops.
Prome Minister ta yama bon bini na señora Alexandra van Huffelen y ta spera cu bon cooperacion y respet mutuo continua pa asina hunto logra mas pa Aruba y Reino.
