Diahuebs ultimo, Prome Minister Evelyn Wever Croes a duna di conoce cu a publica e relato anual di aña 2019.
E relato aki tambe a ser presenta den Parlamento diabierna ultimo, di loke ta trata e ministerio aki hunto cu integridad, overheidzorg, innovacion y energia e ta bisa cu pa aña 2019 no tabata un aña facil, tabatin hopi reto en general debi na situacion financiero di e pais pa asina baha e gastonan di gobierno y personal.
Tocante esaki, Wever Croes a manifesta cu a pesar di tur e retonan aki a logra y nan ta cera aña cu e cifra di 4 miyon di deficit, pa loke ta trata su ministerio el a señala cu nan lo sigui inverti den e departamento den e app di gobierno di Aruba y tambe den corant di isla on-line y pa otro aña ta enfasis riba e media web.
Pa loke ta relaciona cu reino, el a enfatisa hopi den e relacion entre e prome minister di Aruba, Corsou y Sint Maarten, y tambe e relacion cu reino cu no tabata hopi bon desde e welga di hamber di e ex-Prome Minister Mike Eman y poco poco ta drechando.
Tambe el a enfoca riba e tema di calamidad, esaki ta algo cu mester tuma na serio pa motibo cu un isla den Caribe cu por haya retonan riba tereno aki y danki na e preparacion ey, nan por atende cu e atake cibernetico tambe na hospital cu ainda ta den fase di crisis pa evita cu e lo bira un calamidad y den esey nan a nombra un crisis manager cu a wordo apunta pa un luna atende cu e retonan.
Di mesun manera, Wever Croes a papia tocante crisis migratorio di Venezuela cu el a sigura cu nan a purba di atende di e miho manera posibel ariba propio forsa tur e tempo aki pero e ta algo “cu tin nos hopi preocupa”, pa e cantidadnan di persona cu ta na Aruba aworaki cu no tin status legal ta mas di 10.000 persona y esunnan cu a pidi asilo ta mas di 2.000, esaki a caba cu e poblacion a aumenta den 10%.
Wever Croes a menciona cu tambe tin un comision versterking democratisch bestel cu e meta pa fortifica e fundeshi democratico pa e pais specialmente den institutonan halto di estado cu mester percura pa e control riba gobierno y pa percura cu e democracia ta wordo preserva.
