Prome Minister Mike Eman siman pasa a biaha pa Corsou unda el a presencia instalacion di sra. mr. E.A. Saleh como Presidente di Corte Comun di Husticia.

 Na e ocasion aki tambe tabata presente Gobernadornan di Sint Maarten, Corsou y Aruba. Tambe Vice Presidente di Raad van State mr. Donner y mr. Silvis, Procurador General di Hoge Raad der Nederlanden; Dennis Bryon, Presidente di Corte di Husticia di Caribe.

Na e mesa berde durante e ceremonia, tabatin representante di tur e partinan di Reino Hulandes den Caribe y cu a conta cu presencia di Presidente y Huesnan di Corte di Husticia di Caribe. E ceremonia cu tabatin un duracion di un ora a cuminsa cu e “reclamacion” di PG pa despues Griffier a lesa e Decreto Real pa e nombramento. Di e forma aki mr. Saleh a wordo instala como e di 24 Presidente di Hof, unda cu el a cuminsa traha desde prome di januari, 2017.

“Su nombramento ta e final di un proceso logico di sucesion pa Hof. Durante mi instalacion mi a bisa cu cada funcionario for di e momento cu e wordo apunta, mester cuminsa traha riba su reemplaso. Esaki ta garantisa continuidad den e organisacion y ta costa menos esfuerso pa ora e momento di reemplaso yega,”van der Poel, Presidente saliente di Hof, a expresa den su discurso.  El a sigui bisa “cu esaki den mente mi a pasa mi conocemento y experencia como Presidente pa pone un fundeshi fuerte pa futuro y sigura realisacion di e sucesion. Mi ta considera cu mi mision ta cumpli. Mr. Saleh no ta un nobato ora cu ta trata di maneho,”van der Poel a bisa.

Corte Comun di Husticia of Hof ta valido pa Aruba tambe. El a repasa e posicionnan cu sra. Saleh a ocupa, manera por ehempel for di 2010 e tabata miembro di Hof y pa hopi aña tabata reemplasante di e Presidente. E tabata para na inicio di e base di creacion di e organisacion y a pasa den tur e fasenan di cambio na Hof. P’esey e ta haya cu e ta e persona miho prepara, mas ainda pasobra sra. mr. Saleh mes a expresa cu e ta cla pa e posicion y e tin e gana pa haci e trabou.

Despues di a finalisa su estudio di Abogacia na Hulanda, el a traha for di 1991 te cu 1996 como abogado na Amsterdam y na Corsou, pa despues cuminsa su estudio di RAIO. For di 1999 e ta miembro di Hof y desde 2009 Vice Presidente pa cortenan na Corsou y Boneiro.

Na final mr. Van der Poel a expresa cu Hof tin hopi confiansa den sra. mr. Saleh y ta contento cu e tabata dispuesto pa asumi e posicion di Presidente.

Prome cu su instalacion mr. Saleh a bishita Prome Minister Mike Eman na Aruba unda a combersa riba loke ta pensamento di e Presidente nobo pa e instituto cu e ta representa desde prome di januari ultimo. Na final di e ceremonia Prome Minister Eman a probecha pa un bes mas felicita mr. Saleh y expresa cu e por conta cu cooperacion di Aruba.