Prome minister Eman hunto cu minister Dowers a honra polisnan pa acto heroico

Diadomingo Aruba a wordo asota pa awasero torencial cu a laga hopi area riba e isla den un situacion penoso. Masha hopi cas a wordo afecta pa yobidanan fuerte cu a suta e pidi baranca aki.

Autonan a cay den awa y a wordo hiba pa rooinan cu coriente fuerte. Den un di e casonan aki cu un auto unda un famia tabata aden, a cay den rooi y a wordo lastra, polisnan cu tabata den e bisindario no a duda ningun momento y a bula mesora den awa pa scapa bida di un mama, tata y un yiu chikito. Un acto sin duda di curashi y hopi determinacion. Fotografo Famous Diaz a saca e potretnan cu a bay mundo rond. Prome Minister Eman kende durante henter e dia  a cana den a areanan afecta a tuma nota di e acto heroico aki y kier a honra y gradici e polisnan aki. Esaki a sosode den presencia di Minister di Husticia Dowers y varios polis cu a compaña nan coleganan. Comisario Dolfi Richardson cu masha orguyo a para banda di ‘su’ polisnan na momento cu nan a haya nan moneda di reconocimento. Un momento bunita y emocional.

Eman: “Hunto cu mi colega mi kier honra shete heroe cu durante momentonan sumamente peligroso a yuda un famia cu tabatin mester di e ayudo ey. Nan a pone nan propio bida na peliger pa a salba e bida di otronan.” Eman a bisa cu esaki naturalmente ta parti di e preparacion di esunnan cu ta den cuerpo policial. “Sinembargo ora cosnan bira asina evidente y den un momento real cu e pasonan mester wordo tuma y e riesgonan cori, nos a mira con miembronan di nos cuerpo policial tin e curason y pasion y sin duda e curashi pa haci lo necesario.”

Despues di haci entrega un bunita moneda na Richard Jones, Habib Gonzalez Cabeza, Candrick Werleman, Richinel Koolman, Eldwin Gomes, Alexander Wernet y Jonathan Werleman, Eman a gradici nan cada un bes mas y tambe henter Cuerpo Policial. Tabatin un persona mas cu tambe a yuda y Eman a bisa di lo tuma contacto cu ne pa e tambe haya e honor mereci.

Eman: “Nos tin un tremendo Cuerpo Policial y esaki a keda demostra un bes mas durante e desaster den cual Aruba a pasa aden”.  Haciendo uzo di e quote di e astronautanan cu a bay luna Eman a bisa: “Den polis nos tin e ‘right stuff’ pa haci ‘the right things’. Motibo cu nos ta para awe aki pasobra e right thing a wordo haci.”