Ayera Prome Minister di Aruba, sr. Mike Eman a uni su mes na e expresion di convivencia y solidaridad cu e pueblo di Merca cu e tragedia cu a tuma luga den un club gay na Orlando, Florida. Igualmente e mandatario Arubiano a condena e echo lamentabel aki.
Prome cu e mandatario a dedica su mes riba e tema rond di reapertura di refineria na San Nicolas, den nomber di e pueblo di Aruba el a expresa palabranan di “solidaridad cu e estado Florida y e ciudad Orlando”.
Tambe el a expresa palabra di solidaridad cu Merca y e famianan di e victimanan y di esnan cu sobrevivi e tragedia aki tambe. Como “algo sumamente dramatico”, premier Eman a cualifica loke a tuma luga diadomingo madruga na Orlando. Un echo asina “ta pone nos tur cada bes mas consciente di importancia pa nos crea un comunidad cu mucho mas tolerancia…”, segun e mandatario.
E ta haya cu e sentido di amor pa prohimo semper mester prevalece ariba cualkier diferencia di opinion politico, ideologico cu nos por tin. E mandatario a indica cu den nan periodo di gobernacion nan ta bin accentua e tema di amor pa prohimo, tolerancia y convivencia.
El a destaca e trabounan cu nan a bin realisa den barionan, Dialogo Social, Talk Hall Meeting, den Parlamento y Gobernacion cu un sentido distinto cu nos a conoce den añanan anterior di gobernacion. E tempo aya –segun e mandatario- tabatin hopi antagonismo y poco tolerancia pa pensamento di otronan. “Gremionan practicamente no tabata wordo consulta”, el a bisa.
Na final e prome mandatario a manifesta cu e ta kere cu esaki ta un responsabilidad hopi importante pa nos tur realisa cu e calidad di bida ta esun mas importante. Aunke aspecto economico ta importante pero finalmente calidad di bida ta wordo determina pa e tipo di sociedad cu nos tin.
Ora cu nos tin echonan asina –el a laga sa- nos ta bin realisa con importante e ta pa los di tur aspecto economico pa nos keda inculca e aspectonan importante di normanan y balornan cu ta haci nos hendenan bon cu un “curason pa otro”.
