(AP) — Prome Minister di New Zealand, Chris Hipkins a discuti e interes di su pais pa reforsa su lasonan economico cu China durante un reunion cu presidente Chines, Xi Jinping na Beijing ayera.
Hipkins a bisa cu e enfoke di su reunion cu Xi tabata pa “reafirma nos relacion economico cercano door di sostene negoshinan pa renoba nan conexion cu contrapartinan Chines y yuda crece conexionnan nobo pa sostene recuperacion economico di New Zealand.”
Hipkins ta riba un bishita di cinco dia na China, su prome bishita desde cu a bira prome minister na januari, hunto cu un delegacion comercial representando areanan incluyendo turismo y educacion.
Prome cu cuminsa su bishita, el a describi e relacion di New Zealand cu China como un “parti critico di nos recuperacion economico.”
New Zealand oficialmente a drenta un recesion e luna aki despues cu su economia a contra pa dos kwartaal consecutivo. Oficialnan ta bisa cu China ta clave na tres di e motornan di New Zealand pa recuperacion economico despues di pandemia: exportacion, turismo y educacion.
China ta e mercado di exportacion mas grandi pa New Zealand, y Wellington durante añanan a logra mantene lasonan mas cercano cu Beijing compara cu su aliadonan occidental. New Zealand a duna declaracionnan critico tocante derechonan humano na China y practicanan di politica di exterior, pero generalmente a experimenta menos friccion cu China cu otro paisnan den e region, manera Australia.
Xi a elogia “e gran importancia” di e lasonan entre China y New Zealand, bisando cu bishita di Hipkins tabata “hopi significativo”, segun agencia oficial Xinhua News.
Anteriormente e mesun dia, Hipkins a atende un reunion di Forum Economico Mundial (WEF) na e ciudad di Tianjin hunto cu otro oficialnan stranhero y a uni un ceremonia di firma pa cuatro exportador di New Zealand y nan contrapartenan Chines, segun un declaracion di su oficina. Awe diaranson e ta bay reuni cu premier Chines, Li Qiang.
