E seis isla di Reino Hulandes ayera mainta a firma un acuerdo pa loke ta trata seguridad di alimentacion y riba tema di agricultura na unda prome minister di Corsou Gilmar “Pik” Pisas tambe tabata presente y a trece su punto di bista dilanti tocante esaki.
Den un entrevista, prome minister Pisas, ken ta comparti e cartera aki cu minister Javier Silvania, a sigura cu esaki por ta e futuro di negoshi entre e islanan di Caribe Hulandes, locual ta nifica algo hopi grandi pa nan debi cu na Corsou nan a cuminsa duna inicio na esaki y hopi pensamento tabata cu den cuadro di seguridad di alimentacion mundialmente, e seis pais aki por a uni, debi cu tanto Aruba como Corsou y Boneiro ta mas cerca di otro.
“Si nos mira kico a pasa cu mundo, locual ta pasando cu e guera di Rusia cu Ucrania y pandemia, a keda demostra cu nos mes tin cu yuda nos mes, pasobra e tempo ey ni un hende por a yuda otro y afo nan ta wak mes cu e paisnan den Caribe aki toch a keda demostra cu nos ta yuda otro,” prome minister Pisas a menciona.
Loke tambe a presenta door di e seis isla den conferencia di agricultura ta e ideanan cu tabatin, con nan tin e plan di aanpak. Pisas a sigura cu nan ta bay traha riba e caminda cu nan mester tabata ta for di hopi tempo. “Ta algo cu nos a perde como paisnan, cu awe nos a bin como Antias y aunke nos ta cerca di otro paisnan, nos ta bin perdiendo esey. Locual cu a pasa aki ta hopi importante cu nos tin cu garantisa nos seguridad di cuminda,” el a sigura.
A yega momento pa islanan cuminsa produci nan mesun fruta y berdura, sino den futuro esakinan ta bay ta impagabel, manera el a sigura. “Tin e tecnologianan cu entre tanto e paisnan cu tine mas avansa ta bisa cu nan ta bay duna e cooperacion na e otronan, y esey ta algo grandi, pasobra na momento cu bo ten’e pa bo mes y ami tin cu bay cumpra e producto ey un caminda cu por ta nos no por mantene esaki… E cooperacion aki ta bay ta grandi vooral den e parti di agricultura, cu nos ta bay planta hunto e sistemanan mas sofistica cu tin y cu ta menos costoso, di e cual nos ta bay produci e cumindanan cu normalmente nos no por paga,” prome minister Pisas a señala.
