Ayera Conseho di Minister di Reino, e decision pa aproba sosten di likides pa Aruba a keda posponi pa siguiente reunion. Motibo di esaki ta condicion adicional cu na ultimo momento a wordo poni door di Hulanda. Condicion cu ta cay pafo di e palabracionnan actual y cu ta bay contra nos Constitucion. 

Durante ultimo luna e ekipo di profesional di Aruba a traha incansablemente pa asina logra cumpli cu tur condicion stipula conforme palabracion. Pa locual ta e trayecto di landspakket Aruba a cumpli grandemente locual ta refleha tambe den reporte di esaki door di COHO.  Lamentablemente locual a wordo exigi di Pais Aruba, na ultimo momento ta pa bay di acuerdo pa firma un protocol unda cu lo bypass Parlamento di Aruba. Forsando asina Gobierno di Aruba pa actua contra constitucion y nos a splica Hulanda cu nos no por haci esey.

Recorte di salario

Adicionalmente, a pesar di varios peticion haci pa Aruba, pa bin cu un solucion relaciona cu e recorte di salario di nos empleadonan publico, Hulanda a dicidi di no bay di acuerdo cu esaki y stipula e recorte aki como un otro condicion.  Nos Minister Plenipotenciario na Den Haag, sr. Guilfred Besaril a protesta contra esaki.  Pais Aruba ta lamenta e sucedido aki specialmente mirando cu Aruba a cumpli cu tur condicion. Un punto enfatisa door di Hulanda mes. Awor negociacionnan lo sigui pa yega na otro prome cu e siguiente reunion, den januari, caminda lo tin oportunidad nobo pa yega na acuerdonan fiho cu Hulanda, na bienestar di nos pais.  Aruba tin tur confiansa den esaki y lo sigui cu e colaboracion estrecho y constructivo cu nos madre patria.

Kico esaki kiermen pa Aruba

Esaki tin como consecuencia cu e fondonan di pais Aruba ta limita. Gobierno a traha riba un plan B, y a informa Parlamento di Aruba di esaki e siman aki. A base di e Plan B aki lo por cubri tur e debenan.  Lamentablemente no tin espacio ainda pa por reduci e recorte di salario inmediatamente manera ta e peticion di sindicatonan. Mientrastanto Gobierno di Aruba ta bolbe extende un invitacion na sindicatonan pa dialogo, pa forma un frente uni y mas fuerte.