Den nos edicion di ayera, Bon Dia Aruba a publica un articulo titula “Mal maneho di companianan estatal: Ken ta responsable?” Den esaki, a cuestiona pakico ta permiti pa companianan estatal bay hasta den bancarota prome cu ta haci un intervencion den caso di mal maneho.
E articulo a enfoca riba tres compania, esta Serlimar, Arubus y Post Aruba, cu pa añas a sufri di mal maneho cu a causa cu nan situacion a bira precario.
Esaki a keda destaca den e rapport di Algemene Rekenkamer Aruba (ARA), “Op afstand, maar toch dichtbij”, enfoca riba instancianan cu ta poni na un distancia di pais Aruba. E rapport aki a investiga e periodo financiero di 2018 pa 2020 y bay mas profundo den seis instancia. Den e rapport, ARA a remarca cu e hecho cu ta pone instancianan na un distancia no por nifica cu nan ta for di bista of ta liber di duna cuenta y tampoco por ta asina cu esakinan ta trece gastonan adicional hopi halto pa Pais Aruba pa motibo cu ta crea areglonan sin duracion of costo defini pa por eherce tareanan publico.
Bon Dia Aruba a manda pregunta pa prome minister, Evelyn Wever-Croes, den su rol como lider di gobierno. Bon Dia Aruba a puntra con e control di e NVnan di gobierno ta? E ministernan no ta tene un bista riba e compania prome cu ta mucho laat y ya el a bay bancarota? Ken ta controla e directornan di e companianan aki? Ki mecanismo tin pa sigura cu nan ta bon maneha?
Pa esaki, prome minister a contesta indicando cu “na e momentonan aki, e control final ta den man di e minister bao di cual e compania ta resorta. E minister ey ta representa e accionista, cu ta gobierno. E minister ta institui un hunta di comisario of di supervision cu ta encarga cu esaki. Nan ta haci esaki a base di e reglanan di corporate governance.
Den futuro, companianan estatal lo cay bao minister di finanzas
“Nos a haci varios estudio con pa mehora e maneho di companianan estatal y pa futuro nan lo cay directamente bao supervision di minister di Finanzas,” Wever-Croes a agrega. “Esey ta e miho medida den e caso aki. E traspaso no a tuma lugar ainda pasobra varios minister ta bezig cu ehecuta algun plan di accion den e companianan cu mester finalisa prome.” El a enfatisa cu e hunta nan di supervision y comisario ta esnan cu ta controla e directornan di e companianan estatal, pero cu nan ta haciendo un estudio riba esaki actualmente tambe.
