Prome minister demisionario lo ta na Hulanda otro siman pa reuni cu e Secretario di Estado tocante e fecha 1 di mei y negociacion di Rijkswet

Ayera mainta prome minister demisionario Evelyn Wever-Croes a brinda informacion y un actualisacion tocante e proceso di negociacion pa loke ta e Ley di supervision Financiero Rijkswet, durante un encuentro publico den Parlamento. E la elabora riba e historia tocante con a yega na e punto aki, kico a pasa den e temporada tras di lomba y unda gobierno ta para awo.

E mandatario a splica cu Aruba a ser afecta severamente pa e pandemia di COVID na aña 2020 y esaki a bay cu 25% di Aruba su GDP. Esey a forsa gobierno pa bay bati na porta di Hulanda mirando con e pandemia tabata afecta e pueblo. Hulanda a informa cu nan ta dispuesto pa yuda cu sosten di likides, pero mester a entrega kico ta e gastonan y e ora nan ta presta loke nan ta haya cu gobierno mester paga.

El a sigui splica cu cada luna Hulanda tabata pidi loke gobierno di Aruba tin mester y tabata manda semper un poco menos. Na juni gobierno a bisa cu no por sigui traha cu e condicionnan ey y Hulanda a bisa nan ta bin cu un pakete cu ta contene tur e condicionnan. E pakete ey a resulta den dos Rijkswet, uno tabata e RAft ey e otro tabata COHO.

Prome minister a indica cu Hulandaa bin cu e COHO pasobra nan a bisa cu ta nan fia placa pa Aruba sobrevivi den pandemia, pero kier ta sigur cu ta bay tin un economia fuerte y resiliente pa por paga nan back. P’esey Hulanda a presenta e COHO pa Aruba bin cu cambionan institucional pa ta mas fuerte y miho prepara. Y cu COHO tambe a bin e parti di Landspakket.

Di otro banda Hulanda a bisa ta presenta e RAft pasobra como cu nan ta presta placa, nan kier tin mas supervision compara cu loke tin cu e LAft.

Gobierno e ora a tene sesionnan nacional cu tur stakeholder, a tene varios reunion cu gremionan comercial y sindical pa informa kico ta pasando y a tene sesionnan cu partidonan politico tambe. No solamente esunnan representa den parlamento e tempo ey, pero tamb pafo di parlamento. Mayoria di e politiconan a asisti pa asina hunto por a yega na un liña.

“E liña tabata pa bay Hulanda y bisa Hulanda cu e condicionnan aki den e COHO y RAft pa cuminsa nan tabata hopi y inaceptabel riba un termino asina cortico, purba habri e porta pa negocia cu Hulanda pa yega na condicionnan mas faborabel pa Aruba,” e mandatario a splica.

Esaki a haci cu a habri porta pa negocia, pero Hulanda no a duna Aruba e placa tanten cu no bay di acuerdo cu e Rijkswet.

E situacion aki, prome minister a remarca, a pone Aruba den un posicion hopi critico. Den luna di september di 2020 gobierno a haya capital local presta na un interes un poco mas halto, y a haya alivio cu por a sigui cumpli cu e debernan mientras ta negociando cu Hulanda.

El a indica cu a pesar cu a sigui na mesa pa negocia, na november gobierno a haya su mes forsa di bay di acuerdo cu e Rijkswet pasobra no mas placa y no tabatin mas capita local pa presta tampoco.

Dia 13 di november 2020 Aruba a firma un acuerdo cu Hulanda bou di e condicion cu e leynan cu nan a negocia te na e momento ey, pa pone nan den proceso pa yega Raad van State pasobra Aruba tabata sigur cu Raad van State lo ta hopi critico di e leynan aki.

“No tabata por otro, e tabata un momento hopi dificil pa firma e acuerdo eynan, pero e tabata necesario pasobra no tabatin placa mas ta drenta pais Aruba,” e mandatario a enfatisa.

Hulanda a palabra cu lo sigui yuda Aruba cu sosten di likides. A palabra tambe cu pa loke ta e reformanan esakinan ta bay ta den cuadro cu e Landspakket. Prome minister a indica cu e landspakket riba su mes Aruba no tabatin hopi problema cune pasobra nan a usa un 80% di loke Aruba a identifica como e reformanan cu mester aplica. Loke tabatin problema cune ta e Rijkswet cu mester a rigi e Landspakket, cu ta e COHO.

El a sigui splica cu unabes cu ley a bay Raad van State y e organo a duna un veredicto bastante negativo riba ambos ley, di parti di e nivel bestuurlijk no tabatin e disponibilidad pa bolbe negocia e contenido, y asina mester a entrega e ley na parlamentonan di Aruba y Hulanda. Fraccionnan den parlamento, MEP cu RAIZ y AVP a indica cu manera cu ley ta riba mes no ta aceptabel.

Despues di algun luna di negociacion fuerte entre Hulanda cu Aruba, Corsou y Sint Maarten, Hulanda a trek in e COHO y na su luga a bin un onderlinge regeling cu no ta un ley di Reino y e contenido aki Aruba si tabata di acuerdo cune.

A purba pa aplica e mesun argumentonan cu a aplica pa trek in e COHO pa cambia e Rijkswet den un onderlinge regeling tambe, pero no a logra y no tabatin argumentonan cu por a convence Hulanda diferente.

Despues di keda negocia a yega e fecha 10 october 2023, cu ta e fecha cu mester a yega na un acuerdo di pago back pa e prestamo di pandemia. E prome dos aña e prestamo tabata na cero interes, pero e palabracion tabata indica cu pa e fecha aki mester tin acuerdo riba mesa cu un porcentahe di interes.

Mientras tanto parlamento a pasa un mocion pa trek in e RAft, pero Hulanda a menasa cu un default na october 2023, un menasa cu prome minister a enfatisa gobierno a tuma hopi na serio y asina gobierno haya su mes forsa un biaha mas di firma na 6.9%, cu ta un interes hopi halto.

Parlamento a indica na cierto momento den un mocion pa gobierno sigui negocia cu Hulanda a base di algun cuadro cu parlamento a duna pa negocia y purba baha e interes. Un di puntonan di salida di parlamento den emocion tabata pa e autoridad di Parlamento di Aruba no ser mina y pa cualkier solucion cu bin mester ta constitucional y no antidemocratico. Parlamento a indica tambe cu nan kier mira un bon clausula di salida den e acuerdo.

Prome minister a splica cu basa riba esey gobierno a sigui negocia cu Hulanda y na maart di 2024 tabatin un apertura pa purba baha e interes. Dia 4 di juni a yega na un acuerdo nobo cu Hulanda, un acuerdo caminda e RAft ta serelimina, y lo sigui negocia riba otro tipo di Rijkswet, un solucion hibrido caminda ta bin un Rijkswet cu ta duna e cuadro, e definicionnan, pero e numbernan, numeriek ta den landsverorodening di Aruba caminda Parlamento di Aruba ta dicidi e normanan.

Otro punto cu a palabra den e acuerdo aki ta cu e debenan cu Aruba tin di prome cu COVID, nan ta dispuesto pa refinancia esey tambe na un interes mas abou. Ademas nan a palabra tambe cu ta bay cambia e normanan financiero di pais Aruba pasobra e normanan cu ta den e LAft aworaki ta tipico di un pais cu ta den deficit, pero awo Aruba ta un pais cu ta presenta un presupuesto cu surplus y e normanan ey no ta aplicable mas y ta hasta stroba desaroyo.

Hulanda a bay di acuerdo pa Aruba revisa su normanan y pa evita discusion a pidi pa laga IMF haci esaki y dentro di poco e rapport aki lo ta kedando cla. Segun e mandatario tanto Aruba como Hulanda manda nan reaccion riba e ultimo draft di e rapport, pero e rapport final no ta cla ainda.

A palabra tambe den e acuerdo di juni aña pasa cu pa dia 1 di mei di e aña aki mester entrega e ley di Rijkswet nobo na Tweede Kamer y na Parlamento di Aruba.

Pa loke ta con e negociacionnan ta andando aworaki, e mandatario a splica cu ora cu a yega na e acuerdo juni aña pasa gobierno a institui un comision nobo pa encarga su mes cu e negociacionnan.

El a remarca cu e negociacionnan ta bayendo bon y nan ta hopi satisfecho con tur cos ta bayendo. El a indica cu nan ta negociando keto bay riba nivel ambtelijk, y riba nivel bestuurlijk no a cuminsa delibera ainda. E negociacion ainda ta den cuadro di emocion cu parlamento anterior a duna y tardansa den esaki ta mas tanto debi na IMF.

Algun aspecto importante di negociacion cu prome minister a resalta ta e normanan cu IMF ta propone, mester tin un bon clausula di salida pasobra awor no tin uno, y otro tema cu ta ser trata ta e rol di CAft den e esaki y introduccion di un propio Begrotingskamer di pais Aruba.

“E meta di e negociacion aki ta pa nos haya un cuadro di ley cu ta mas beneficioso pa Aruba cu loke nos tin awor, mas flexibel cu loke nos tin awor,” el a subraya.

E mandatario a informa cu otro siman e ta na Hulanda pa reunion cu Secretario di Estado riba e proceso di negociacion y tambe ta cuminsa papia di e fecha di 1 di mei pasobra e palabracion aña pasa tabata cu si mira cu e fecha 1 di mei ta yegando y no tin e acuerdo, e ora mester cuminsa papia na januari tocante esey.

“Esaki ta e status. No tin algo concreto ainda di e negociacionnan. Manera cu tin algo concreto y prome cu e wordo concretisa mester bin parlamento prome pa parlamento duna su opinion tocante esaki,” prome minister a remarca.