Durante un conferencia di prensa di Gobierno di Aruba ayera den oranan di atardi, prome minister demisionario Evelyn Wever-Croes a trece dilanti e flexibilisacion di medidanan pa loke ta trata pandemia di Covid-19.
El a informa cu te ainda, tin 64 caso activo di Covid-19 na Aruba y cu tin un averahe di caso nobo pa dia di 11, e ‘positivity rate ta na 13%’ segun e averahe di e ultimo 7 dia.
Loke ta indica cu tur dia tin 11 caso nobo y tambe cu di e testnan di cada dia 13% ta sali positivo. Esaki ta indica cu e aspectonan mas critico di e pandemia ta bao control segun loke Wever-Croes a indica, pero e crisis no a pasa ainda.
Ta p’esey cu e siguiente flexibilisacion ta hustifica na unda entrante diaranson awor 9 di juni. Un di e punto cu ta wordo flexibilisa ta esun di cuarentena: si un persona ta wordo vacuna no mester bay den cuarentena. Uso di tapaboca no ta obligatorio mas, pero ta recomendabel us’e si no por tin distanciamento di mas di 1.5 meter, establecimentonan por exigi uso di tapaboca si asina nan ta dicidi.
“Awor e responsabilidad ta cambia, di ta gobierno cu ta obliga bo di haci’e y esey ta stop, pero awor a bo ta dicidi” el a bisa.
Pa loke ta trata deporte, for di diaranson awor ta permiti pa deporte tin publico sin limite y tambe contact sport ta permiti atrobe, gebiedsverbod ta wordo elimina.
Otro medidanan como ora di ciere y alcoholverbod ta keda vigente, y no mag di baila ainda den establecimentonan y actividadnan cu aglomeracion no ta permiti.
El a anuncia tambe cu for di awe tin un ‘bubble’ entre e islanan Aruba, Boneiro y Corsou na unda ta haci posibel e ora cu un persona ta biaha entre e islanan aki y persona ey ta vacuna, e no tin necesidad di haci un PCR test ora ta drenta back na Aruba.
Igualmente, el a trece dilanti cu diaranson awor tambe ta yega e prome crucero despues di e pandemia na unda lo trece 546 pasahero a bordo di e Celebrity Millenial y otro 770 persona, tur e pasahero cu ta riba 18 aña ta vacuna cu lo segun loke Wever-Croes a señala, menos muchanan bou 18 aña cu no por vacuna pero a haci e PCR test, e barco aki a sali for di Sint Marteen diasabra ultimo.
Aunke aspecto di salud na e momentonan aki ta bao di control el a sigura, te ainda Aruba ta depende hopi di Hulanda den materia economico pa loke ta trata e ayudo di FASE y subsidio di salario.
Den relacion cu cortamento di salario, Wever-Croes a manifesta cu esey tanto den sector publico como den sector semi-publico ta depende di e recuperacion economico algo cu ta tumando luga y si cosnan lo sigui asina pronto lo yega e momento pa e cortamento di salario tambe lo por wordo elimina.
“Mi no por bisa fecha exacto y nos tur sa cu esaki ta depende tambe di negociacionnan cu Hulanda mirando cu ta Hulanda esun cu a pone e condicion di tot nader order, mester haci esaki pero nos a caba a cuminsa haci cierto dialogo cu sindicatonan” Wever-Croes a bisa.
