Ayera mainta durante un conferencia di prensa di prome minister demisionario Evelyn Wever-Croes, el a papia tocante recuperacion di pais Aruba y tambe di salud mental cu a bin mustrando despues di Covid-19, ademas di e poco casonan di Covid-19 cu ta wordo registra pa dia.

Tocante e positivity rate cu ayera tabata ubica na 6% y e casonan activo tabata na 18, tambe el a sigura cu pa dia e averahe di casonan ta 3, pa loke nan por bisa cu nan tin e parti di crisis di salud domina, segun Wever-Croes a menciona.

Di mesun manera, el a indica cu na e momentonan aki 67% di e poblacion general a wordo vacuna pero e meta ta pa yega na 85%, pa esey nan tin campañanan cu lo cuminsa pa mas hende por adkiri e vacuna, di e personanan di 60 aña bay ariba 71.8% a haya nan vacuna, “nos ta bayendo hopi bon caba pa loke ta vacunacion”, Wever-Croes a bisa.

Ta un hecho cu e pandemia aki y tur e medida cu a bin hunto cu e pandemia loke a ocasiona hopi presion riba e salud mental di e ciudadanonan, di esaki, Wever-Croes a declara cu nan a reuni cu Fundacion Respaldo, AZV y DVG siman pasa na unda nan ta esunnan encarga cu Crisis Plan y con nan ta bay traha riba salud mental di e poblacion, nan lo ricibi e plan e siman aki pa nan wak si tin fondonan disponibel pa hunto cu otro stakeholders por traha pa trece e trankilidad den loke ta trata salud mental den comunidad.

Di loke ta trata turismo, Wever-Croes a señala cu na e momentonan aki a registra un recuperacion di 55% door di e cantidad grandi di turistanan cu a bin den ultimo tempo, el a sigura cu na luna di mei 70.000 turistanan a bin Aruba lo cual ta algo bon y si e tendencia ey ta sigui continua el a premira cu pa fin di aña por cera e aña cu un recuperacion di 68% di turismo.

Asina mes, el a trece dilanti cu barco crucero tambe a cuminsa yega poco a poco y di esaki el a remarca cu den esun cu a yega na Aruba diaranson utimo a presenta dos caso “asintomatico” di Covid-19 despues cu e barco a sali for di Aruba, “nan no tabatin ningun sintoma y e chens pa pega otro hende ta minimo” ademas, el a bisa cu mesora e protocol a bin na luga pa asina minimalisa tur e riesgonan.

Te ainda, ta tin 4.000 persona cu ta depende di FASE door cu nan a perde nan trabou pa via di Covid-19 y di esaki el a expresa cu no por bisa cu pandemia ta tras di lomba tanten cu e personanan aki ta sigui depende di FASE y no lo haya un trabou.

Ademas, 14.000 persona cu ta traha den sector priva ta depende di subsidio di salario y cu no ta tur hende ta cobra 100% di nan salario ainda, varios ta cobra 60% y segun nan ta compronde di e doño di trabou, esey ta pa motibo cu no a recupera completamente.

“E crisis t’ey ainda, nos ta den memey di dje ainda, nos a domina e aspecto di salud pero aspecto social y economico, nos no a recupera ainda”, el a afirma.

Importante ta cu aworaki cu ta mira un tendencia di crecemento, nan ta ripara cu tin un luz na final di tunnel pa loke ta trata algun problemanan, como por ehemplo, e contribucion di solidaridad cu nan a pidi pa sector publico y semi-publico cu segun Wever-Croes a informa akinan tambe nan ta mirando un luz na final di e tunnel, si e tendencia ta continua.

Nan ta evaluando e situacion di crecemento economico, nan ta evaluando cuanto ta falta pa por yega na e 100% cu nan tabata prome, pa asina por cuminsa kita e cortamento di salario riba empleadonan publico y semi-publico.