Diahuebs mainta, prome minister demisionario Evelyn Wever-Croes a tene un conferencia di prensa durante cual el a presenta e Relato Anual 2024 (Jaarverslag 2024) di su ministerionan, minister di Asuntonan General, Innovacion, Organisacion Gubernamental, Infrastructura y Planificacion Teritorial.

Cada aña desde cu el a drenta gobierno, prome minister ta publica e Relato Anual pa ser entrega na diferente instancia. El a agrega cu e ta considera esaki tambe “como un traspaso di locual mi a bin ta haciendo durante e siete aña y mei aki, pero un traspaso na pueblo di Aruba cu tur transparencia. Aki ta para tur locual nos a bin ta haciendo.”

E relato anual, el a splica, ta consisti di varios capitulo. E prome capitulo ta trata e ministerio di Asuntonan General den cual ta repasa con hopi a cumpli cu palabracionnan haci den e acuerdo di gobernacion, cual el a señala mayoria a ser cumpli.

El a indica cu den e capitulo tambe ta splica con ta bayendo cu e reformanan, y alabes a menciona cu Aruba ta bayendo bon cu e reformanan, y ta trece dilanti e retonan cu ta encontra pa cu e reformanan.

El a agrega cu den e capitulo aki ta papia di relacionnan den reino, kico tur Arubahuis a bin ta haciendo como un departamento cu ta resorta bou di su ministerionan. Ta menciona e relacionnan exterior y kico tur ta haciendo den e tereno aki, y ta elabora tambe riba e crisis migratorio den henter Sur America, no Venezuela so.

E mandatario a sigui splica cu den e capitulo uno ainda tambe tin e departamento di DWJZ y den esaki por mira cuanto proyecto di ley a ser traha durante e aña pa departamento aki. El a remarca cu DWJZ ta un departamento cu tin hopi reto pa loke ta personal profesional cu ta specialisa den skirbi ley.

Despues ta sigui pa e departamento di Seguridad Nacional, ta toca e tema di calamidadnan y CMO tambe ta reporta tocante esey, y ademas tin hopi informacion riba impacto di e crisis migratorio di Venezuela.

El a indica cu tambe ta menciona comunicacion riba loke ta trata r conferencianan di prensa, trabounan cu BUVO, y ta menciona tambe e diferente comisionnan cu e mandatario a lanta den su ministerio.

Un di e puntonan cu el a enfatisa ta e parti den cual ta elabora riba e gastonan di oficina di Minister President. El a splica cu e ta haci esaki tur e ocho relato anual cu el a traha y den cada un e ta compara su gastonan cu e gastonan di e minister presidente cu tabata na mando prome cune.

 

E minister president prome cune tabata Mike Eman. El a splica cu e tempo ey na 2017 Eman tabatin 147 hende riba su payroll, compara cu e 24 hende cu e tabata traha cune. Esaki, el a indica, ta un diferencia di 123 hende y e diferencia den gasto ta di 8.6 miyon florin, cu el a remarca el a spaar cada aña, compara cu locual Mike Eman tabatin

“Mi ta enfatisa esaki un biaha mas pasobra tin e riesgo cu e ta bolbe bira minister president y mi no ta cansa di subraya e hecho cu e gran cantidad di hende cu e la paga pero no a traha no a haci un miho trabou cu nos a haci cu apenas 24 hende durante e siete aña y mey aki,” prome minister Wever-Croes a enfatisa.

Apart di e gastonan di personal, el a indica, tin un comparacion tambe di otro tipo di gastonan. El a menciona cu por ehempel e gastonan di biahe di sr. Eman tabata hopi mas halto, y esaki, el a remarca, ta sin tene cuenta cu inflacion cu a aumenta costo di biahe hopi y asina mes su gastonan di biahe tabata mas abou.

Pa loke ta promocionnan y propaganda, e mandatario a indica cu Eman tabatin un budget di riba 1 miyon florin y durante su mandato a logra baha cu casi 90%. El a agrega cu e gastonan di lease auto tambe el a reduci cu mas cu mita.

“Den total pues, den tur esaki nos ta mira cu no solamente pa e gastonan di personal, pero tambe e gastonan total nos ministerio, cu menos hende y menos gasto, a haci miho trabou cu nan a haci durante tempo cu no tabatin crisis y cu nan a redobla e debe di nos pais,” prome minister Wever-Croes a subraya.

E di dos capitulo di e relato anual, el a indica, ta trata e tema di innovacion y den e capitulo aki ta papia di diferente instituto cu ta encarga cu innovacion, entre otro, Directie voor Innovatie, Futura y DIA.

El a splica cu capitulo tres di e relato anual ta e capitulo di organisacion gubernamental y ta trata cu e diferente departamento di gobierno cu ta resorta bou di su ministerio cu ta encarga cu organisacion gubernamental.

E capitulo aki, el a señala, ta uno cu hopi hende tin hopi interes den dje y ta cuminsa cu departamento di Recurso Humano cu ta papia di e cantidad di trabou cu nan tin. Pero un punto cu el a enfoca riba dje ta e ziekteverzuim, e AO den gobierno.

El a indica cu na comienso di Gabinete Wever-Croes e porcentahe di AO den gobierno tabata halto. Esaki, el a menciona, a bin ta baha for di 8.6% na cinco aña pasa pa 5.9% aworaki. “Esaki nos ta considera un logro importante pasobra e punto di AO den gobierno semper tabata un problema grandi pa nos por a deal cune,” el bisa.

Otro aspecto cu el a remarca ta e tema di cantidad di personal. Den e esaki el a splica cu desde 2017 tabatin mas cu 4800 persona den servicio den gobierno y aworaki ta cera su mandato cu un poco mas cu 4200. El a señala cu despues cu el a baha el a bolbe aumento un poco cu 30 persona netto, cual el a splica tabata pasobra a busca mas polis y mas hende pa traha den cadena hudicial. Den e relato anual, el a indica, ta para tambe kico ta e motibo cu e hendenan a bandona servicio di gobierno.

Capitulo cuater den e relato anual ta toca e ministerio di Infrastructura y Ordenansa Teritorial. Prome minister a splica cu den e capitulo aki tin relato di de departamentonan DIP,. DLV, conoci manera Kadaster, DOW y DTI.

E mandatario a splica cu den e relato anual e ta duna su bista pa 2025. Den esaki e ta splica con e ultimo reunion cu CAft a bay algun siman pasa caminda nan a bisa cu Aruba ta para hopi bon pa loke ta finanzas, cu tin un surplus financiero di 4.4% y cu e posicion di salida di su gabinete pa cu e gobierno nobo ta uno hopi bon.

El a indica cu esaki ta duna tambe espacio pa mas reforma pa sigui traha pa haci e pais mas fuerte y resiliente. El a remarca cu e gastonan di interes ta hopi halto, pero tin un formula pa baha esey. El a menciona cu e negociacionnan cu Hulanda ta bayendo bon, pero mester wak kico e gobierno nobo ta bay haci cu esaki teniendo na cuenta cu partido AVP ta contra e Rijkswet.

“Nos ta laga tur cos cla. Mi ta laga un menu amplio pa e gobierno nobo por scoge. Bo ta scoge pa bay paga interes abou y bin na acuerdo riba un Rijkswet, of bo ta scoge pa paga interes halto sin un Rijkswet,” el a señala.

El a indica cu den su bista pa futuro e ta recomenda tambe pa traha riba finalisa e trabou cu nan a bin ta haci riba seguridad social, pa hendenan cu sea a perde trabou of cu no por haya trabou tin mas sosten.

Por ultimo el a indica cu e ta recomenda pa gobierno nobo tuma pasonan pa bin cu solucionnan structural pa loke ta e fondonan di AZV y AOV. El a menciona cu lamentablemente e gobierno nobo kier bay full otro direccion, cu den su opinion ta bay pone e fondonan aki den peliger. Ademas, el a menciona cu mester duna atencion na e tema di embehecimento y cuido di nos grandinan.

“Pero awor ta e momento cu nos ta lagando hopi atras. Bo por tuma bon decision si bo kier tuma bon decision,” el a subraya.