Oposicion a keda sin haya informacion riba e prijs di Eagle LNG y WEB, a pesar di dos dia di reunion

“No ta pasobra mi ta cuestiona Gobierno mi ta sostene oposicion, y no ta pasobra mi ta parti di coalicion mi no por cuestiona Gobierno,” asina lider di fraccion di RAIZ, Raymond Kamperveen a bisa ayera nochi durante continuacion di e reunion publico riba e acuerdo di Eagle LNG y WEB.

Kampsteeg a mustra cu no ta pasobra e ta critico, ta nifica cu e kier kita sosten di Gobierno, pero e ta pidi transparencia si, y a entrega un mocion pa mas transparencia riba e contract y tambe pa introduci un proyecto piloto pa hidrogeno denter di tres aña, ademas cu den e introduccion di e Corporate Governance ta duna Parlamento e hermentnan pa controla maneho cu ta afecta henter comunidad.

E continuacion di e reunion publico a cuminza laat pa motibo cu e partidonan di coalicion, MEP y RAIZ a drenta den un asina yama ‘spoedberaad’ prome. Y aunke e reunion a dura dos dia, na final di dia, ainda ningun hende sa kico ta defini den e contract, manera Parlamentario di AVP mr. Gerlien Croes a bisa.

Pensamento Nazi

Pero tabata Prome Minister Evelyn Wever Croes cu a bin cu e palabranan mas fuerte durante e reunion. Es mas, el a califica e pensamento di AVP como Nazista. Evelyn Wever Croes a presenta e argumento aki ora cu el a analisa e mocion di desconfianza cu AVP a presenta. Prome Minister Evelyn Wever Croes a bisa cu e lo ta contento di por bay cas, pasobra el a sacrifica su carera, un entrada mas halto, tempo cu famia y bienestar di su famia. Pero bao ningun momento por acepta argumentonan sugestivo manera cu e mocion di AVP ta contene, el a bisa.

Mr. Wever Croes a repasa cada argumento menciona den e mocion cu dr. mr. Ryçond Santos do Nascimento a presenta contra dje.“Oposicion ta acusa mi di ta mete den companianan estatal, pasobra nan a haci’e,” Wever Croes a enfatisa. El a ilustra su pensamento cu ehempelnan con bao Gabinete Mike Eman I y II a abusa di e companianan estatal door di tuma decision cu a afecta e posicion financiero di e companianan aki.

El a bay hopi personal tambe contra dr. mr. do Nascimento kende a presenta e mocion, referiendo na e retiro di e hurista for di Universidad di Aruba y tambe a enfoca riba e proceso transparente di su maneho. “Ami no a habri caminda pa Eagle LNG. Al contrario, ami a percura pa un proceso totalmente independiente basa riba principio di WTO. Ami a inici’e den forma mas transparente.”

Nepotismo

El a nenga nepotismo, ya cu el a sigui e mesun liña di guia di e ley di screening. Y aunke cu companianan estatal ta traha cu bufete di abogado di su tata, esta Croes, Wever & Ruiz, esaki ta na nan, y hasta contra su peticion. Pasobra el a pidi e companianan pa no traha cu e bufete aki. El a mustra cu su Ministerio mes no ta traha cu e bufete di su tata, sino cu un solo abogado, Mr. Hans Sjiemfat pa e caso di Citgo, pero por lo demas ta haci uso di experticio di Departamento di Legislacion y Asuntonan Huridico.

E ta enfatisa cu ta e companianan estatal, nan hunta di comisario y direccion tin e autoridad di nombra personal y tambe yega na acuerdonan, entre otro cu Eagle LNG. Y como cu Eagle LNG a pasa den e destaho publico y a haya sosten di Gobierno Mericano, no ta na su luga pa un hende manera Parlamentario Benny Sevinger por insulta un inversionista. Ademas, Prome Minister a enfatisa cu e nunca a viola integridad, y e acusacionnan cu oposicion ta lanza, ta dirigi na profesionalnan. “Sr. Latie Wever ta toca mi casa na famia si, pero ami no a nombra nan den raad. Y ta hunta di supervision di WEB a nombra Director Interino.”

“Mi no mester di e trabao”

Segun Sra. Wever Croes, e ta haciendo e trabao di Prome Minister pasobra “e ta un honor. E ta un compromiso pa mi pais. Mi no mester di dje. Mi ta haci sacrificio financiero. Ma laga un carera lucrativo atras.” Den su argumento, Prome Minister a mustra con hasta casa di Parlamentario Gerlien Croes lo a ataca su yiu, ilustrando e sacrificio cu su famia a haci pa e por ta na cargo di Pais Aruba. Y a mustra cu e “legacy di Mike Eman ta bay ta e KB cu el a ricibi y su welga di hamber.”

El a cataloga e presentacion di Marisol Lopez Tromp como drama di Mascaruba y a nenga cu e lo a firma pa regala Citgo 320 miyon florin, pero cu esaki tabata garantia den e contract. E tabata representa un riesgo pa Aruba.

Conmocion

Di su banda, Minister Glenbert Croes a priminti cu kier y lo bay habri e refineria y a enfatisa Eagle LNG lo haci esey posibel. Pero en todo caso, el a bolbe enfatisa cu e no por comparti e contract. El a duna WEB pabien pa tuma despedida di HFO y ta bay usa pa LNG pa combustible di transicion. Locual el a lamenta, mescos cu Prome Minister Wever Croes con a trata Eagle LNG y a referi specificamente na Sr. Miguel Mansur. Mansur di su banda a corda e Minister cu Eagle LNG no ta na Aruba pa caridad, sino pa haci ganashi y mester duna claridad. El a ripiti cu e motibo pakico e contract ta pa 20 aña ta pasobra WEB a acopla esaki na e bida di e plantanan di Watsila cu ta bay draai riba gas. Den e proceso aki, WEB a refinancia su debe di 700 miyon, y den esaki ta inclui e 40 miyon cu WEB mester bay cubri pa por ricibi e gas di pipanan di Eagle LNG.

Minister Glenbert Croes a bisa cu e ta haya cu henter e asunto a bira un conmocion, y e mes ta kere cu ta un oligarca na Aruba cu ta sinta tras di henter e discusion riba e contract entre Eagle LNG y WEB.

Ambiente y tono

Eagle LNG mes a indica cu durante e proceso di construccion lo crea 100 cupo di trabao y lo tin un personal di 20 persona pa maneha e planta na Aruba. Minister Croes a sigura cu aunke cu Eagle ta papia di 60 porciento di persona local y 40 porciento di hende di exterior, cu su empeño lo ta pa 80 porciento di esnan cu ta bay traha ta di Aruba. Pero otro cu e deseo aki, mester bisa cu e reunion tabata uno di atakenan personal di ambos banda, hasta riba cabez di profesionalnan di WEB y RDA kendenan tampoco ta permiti pa papia di e contract.

Mester bisa si cu coalicion a keda firme y aunke cu por cuestiona e maneho di Gobierno, RAIZ ta keda sostene e gabinete, a pesar cu no a haya transparencia di e contract.

Mester bisa cu particularmente di oposicion pero hasta di RAIZ tabatin preocupacion kico e contract cu Eagle LNG por nifica pa e futuro di energia di fuente renobabel y hidrogeno cu tabata un punto esencial pa RAIZ. Por ehempel, mientras cu Glenbert Croes a bisa cu denter di tres aña lo por cuminza cu hidrogeno, ehecutivonan di WEB mes a papia cu por cuminza pensa riba hidrogeno (waterstof) te aki 15 aña. Esey ta motibo di e mocion di Sr. Kamperveen tambe.

No a haya mucho informacion

A pesar di dos dia di reunion, no a bin claridad riba e exigencianan di siguridad pa e pipanan di gas, unda nan lo pasa, cua estudio di impacto ambiental tin, y si tin expertonan independiente cu a analisa e estudionan aki. Tampoco, kizas esun mas importante, no a bin ningun bista riba cuanto e prijs cu e consumidor Arubiano lo mester bay paga pa un combustible, cu segun tur dato oficial di Union Europeo, pero tambe di Gobierno Mericano, no ta esun cu ya ta considera pa transicion di fuentenan convencional pa alternativo pa genera coriente. Pa oposicion e ta imposibel cu pueblo cu ta propietario di e companianan estatal, no por haya kico a firma den su number.