Siman pasa durante tratamento di presupuesto 2024 di Gobierno di Aruba den Parlamento di Aruba Prome Minister, Evelyn Wever-Croes, a elabora ariba diferente punto y a contesta pregunta di parlamentarionan tocante un variedad di topico relaciona na Ministerio di Asuntonan General, Innovacion, Organisacion Gubernamental, Infrastructura y Planificacion Teritorial.

E mandatario a splica cu e 22 diferente departamento cu ta resorta bao di su ministerio a traha un documento cu ta contene e metanan pa 2024 den cual a fiha e metanan principal pa aña 2024.

El a remarca cu e metanan aki ta pa primordialmente mehora e servicio na comunidad, di dos pa elimina atrasonan, di tres pa pone mas atencion na digitalisacion a traves di e proyecto di e-government y e di cuater ta restructuracion di e departamentonan di gobierno.

El a agrega cu den e documento ta menciona tambe cu tin reto y e retonan principal cu ta wordo subraya ta cu no tin suficiente medionan y tambe e falta di personal den e departamentonan.

“Den e documento aki por mira cu mayoria departamento cu ta resorta bao di mi ministerio, kico ta bay ta e metanan principal pa 2024,” el a resalta.

Prome Minister a contesta diferente pregunta cu a toca diferente tema. Parlamentario Mervin Wyatt Ras a puntra tocante e 141 vacatura nobo cu den gobierno y con esaki ta relaciona su mes cu e personeelsstop.

E mandatario a splica cu den documento presenta por mira cu na su ministerio no tin ningun vacatura y cu e vacaturanan aki ta na diferente departamento. El a indica cu den e documento por mira cu e diferencia entre 2023 y 2024, specialmente despues di e najaars nota, ta hopi menos di cual un parti hopi grandi ta bay pa defensie.

Prome Minister a señala cu e cantidad di vacaturanan plus e ocupacion pa 2023 tabata 4.663 persona. El a remarca cu esaki ta e punto mas abao cu pais Aruba a yega di experiencia desde cu Aruba ta un pais.

El a agrega cu pa 2024 e ta bay baha per saldo aun mas, na 4.448. “Esaki ta nifica cu gobierno ta logrando di baha su gastonan di personal structuralmente y e aumento di e cantidad di vacatura, manera cu ta aparece den e presupuesto, ta mas bien pa reemplasa e personal cu a sali for di servicio for di gobierno pa reforsa trabaonan di landspakket y pa duna sosten na cierto departamentonan cu tin mester di dje,” el a indica.

E mandatario a referi tambe na e mencionamento cu tin hopi vacatura na DIP. El a señala cu debi na e caos ocasiona pa tur e ministernan encarga cu DIP prome cu el a tuma e departamento over, tur e investigacionnan penal cu tabatin riba e ministernan prome cune, hendenan ta bay traha na DIP y ni den seis luna nan ta bandona e puesto.

“Pesey tres aña pasa a busca dos hurista y den ni seis luna nan a bay. Dos aña pasa a busca hurista, nan a bay, aña pasa a busca hurista nan a bay, e aña ki a busca hurista atrobe y mi ta spera nan keda mirando cu aworaki poco poco nos ta poniendo ordo,” el subraya.

Prome Minister a contesta pregunta tambe tocante e landspakket, kico ta cla caba di e landspakket y kico ta bay cu e landspakket den 2024.

Tocante loke ta cla cana di e landspakket, el a menciona Aruba Fair Trade Authority, Land Aruba Academy, caminda e ambtenaarnan por ricibi curso gratuitamente, road map di e gestion financiero di presupuesto y politica financiero tambe ta cla, investigacion di entidadnan gubernamental tambe ta cla y introduccion di prestatiemanagement. Tambe, el a indica, a traha cu diferente departamento documentonan di politica pa loke ta recurso humano, a cera un zorg akkoord, entre otro.

Pa proximo aña den e agenda di implementacion pa e prome kwartaal di 2024, cual ya caba a wordo firma, tin un cantidad di 127 accion cu ta spera Gobierno di Aruba pa loke ta e landspakket y cu e profesionalnan ta bay traha riba dje den e diferente areanan, di cual 88 tin deadline.

“Nos ta papiando di un reto hopi grandi pa nos profesionalnan por atende cune den e prome kwartaal. Mi mester bisa si cu nos tin un bon progreso den tur e accionnan aki,” Prome Minister a remarca.

Pa loke ta e-governemnt, contestando pregunta tocante e tema aki, e mandatario a splica cu den aña 2024 Aruba ta bay ricibi e prome tranche di e placa cu Union Europeo a aproba pa e proyecto di e-government. El a splica cu Union Europeo a aproba 14 miyon euro pa e proyecto di e-government y Aruba lo ricibi esaki den un periodo di tres pa cuater aña.

El a agrega cu den 2024 gobierno ta bay enfoca riba e plan cu a wordo entrega na UE, e vision local y con nan ta bay ankra esaki den Aruba su legislacion.

Prome Minister a resalta cu un di e putnonan di salida pa loke ta specificamente e proyecto di e-government ta inclusion. El a splica cu tin un programa special pa yuda esnan cu no tin acceso na computer of cu no tin e capacidad of cu tin miedo pa usa un computer, pa guia nan pa asina nan no bira victima di digitalisacion.

Pa loke ta planificacion di infrastructura den 2024, el a indica cu lo por mira cu e caminda di highrise hotel, fase 1, un banda di caminda, y fase 2, otro banda di caminda, ta bay wordo ehecuta y fase tres ta bay wordo ehecuta den aña 2025, cual ta bira e rioolstelsel.

El a menciona tambe cu RWZI ta bay wordo traspasa, e ta bay wordo privatisa y e incinerator ta bay hunto cune. El a indica cu na momento cu RWZI wordo privatisa, di e ocho miyon florin cu tabata dedica na RWZI, cinco miyon ta bay pa mantencion di caretera y tres miyon ta bay pa mantencion di edifcionan di gobierno.

Apart di esey, el a señala, tin 1.7 miyon florin ta bay wordo inverti pa careteranan nobo, ta bay repara e Wilhelmina-Juliana brug, e parkeerplaats di misa di Santa Theresita ta bay ricibi e reparacion necesario, Seroe Colorado ta bay haya varios verkeersplatuea, e proyecto di caya grandi di San Nicolaas fase dos y e proyecto di amenities cu ta inclui e memorial di segunda Guerra Mundial tambe ta bay wordo ehecuta, entre otro.