Durante su bishita prome minister Mike Eman tabatin oportunidad pa sinta den conseho di minister diaranson mainta y asina haya un comprondemento mas amplio di e retonan cu e isla tin su dilanti.
Conseho di minister di e pais afecta ta reuniendo actualmente na un localidad di emergencia na sede di gabinete di gobernador pa motibo cu edificio gobierno no ta den condicionnan apto.
A base di e reunion ey, sr. Eman a splica cu St. Maarten ta ‘un isla cu ta draai completamente riba turismo, cu practicamente tur hotel a wordo afecta severamente te cu nan no ta den operacion na e momento aki. Algun tin algo di operacion y gran mayoria no tin awa no tin coriente y a keda hopi kibra of den ruina.”
Esey kier men cu, mescos cu infrastructura, casnan y scolnan, e hotelnan ta deteriora of kibra. Esaki ta afecta severamente te cu e pais no ta bay tin entrada economico, segun e mandatario.
“Gobierno, pasobra no tin entrada economico, no ta bay tin entrada di impuesto, nan sistema di omzetbelasting, di winstbelasting, di loonbelasting. E primanan cu mester wordo paga, por ehempel pa pension di behes, nan no ta bay haya nan, pero nan tin cu paga pension di behes. Nan no tin entrada, pero mester paga salario di empleadonan publico. Nan tin cu bay paga naturalmente mas ainda pa yuda e hendenan cu bijstand.”
Deficit astronomico
Mas ainda, e cifranan di deficit y fiansa cu un isla asina manera St. Maarten, den su condicion actual, mester bay drenta aden na e momentonan aki ta asina astronomico. Pio ainda, cu un perspectiva economico cu tin retonan sumamente grandi, segun sr. Eman.
Pa e motibonan aki, y hopi otro mas, Aruba tabata mas cu dispuesto di duna un man na nos isla ruman den Reino, e ta priminti. For di prome cu horcan Irma a yega, ya tabatin compromisonan haci riba tereno di siguridad, asistencia di cruz cora, cuido medico y tambe infrastructura. E ta bisa e cooperacion aki lo continua te ora cu ‘nos rumannan di St. Maarten ta bek riba pia’.
