Durante e conferencia di Prensa diamars mainta en conexion cu formacion di Gabinete Wever-Croes, Prome Minister Evelyn Wever-Croes a duna di conoce cu e rumor cu ta circula cu Aruba lo duna refugio na refugiadonan di Afganistan, ta incorecto.
“Lamentablemente nos tur por mira kico ta sucediendo na Afganistan y unico cos cu nos por haci ta tene nan den oracion y pensamento y cu pronto cosnan por stabilisa y normalisa. Hopi persona ta purba di scapa y huy na e momentonan aki y varios pais ta yudando nan den esaki. Pa Aruba cu ta asina leu, bo ta wak e na television y bo por bira e canal y wak otro cos. Pero e Afganonan ta biba den dje y e ta un situacion hopi dificil. Nos oracion ta cu tur e hendenan aki”.
Prome Minister a enfatisa cu e rumor cu ta circula cu Aruba lo ta un di e paisnan cu lo duna e auxilio na un grupo di 300-400 persona di Afganistan como refugiado, no ta corecto den ningun sentido di palabra. Aruba no ta un di e paisnan yama pa duna refugio na e refugiadonan di Afganistan.
Paisnan grandi, manera por ehempel Colombia, si ta un di e paisnan mas cerca cu ta duna e refugio ey pendiente e entrada di e personanan aki na Merca. “Pues nos ta laga esaki den man di e paisnan grandi cu por carg’e”, Prome Minister a expresa.
Ademas, Prome Minister a sigui bisa, Aruba cu e situacion di Venezuela ya caba a pasa un quotum hopi grandi di persona cu ta aki nan cu a huy di nan pais caba y Gobierno ta purba di atende cu e retonan ey caba.
“Mirando tur e retonan cu nos tin aworaki ta enfrentando, e pandemia cu nos ta den y e situacion critico di Covid, laga nos keda cu cabes friu y no cay den e tipo di temanan aki y plama rumornan pa trece panico of confusion den pueblo”, Prome Minister a duna di conoce.
