Ayera mainta durante conferencia di prensa di gobierno Prome Minister, Evelyn Wever-Croes, a elabora ariba algun topico pa loke ta trata su ultimo biahe di trabao na Hulanda. Un di e temanan cu ta riba mesa y cu ta di gran importancia pa pais Aruba ta e negociacionnan cu Hulanda ariba e ley di supervision LAft y Prome Minister a duna un actualisacion ariba e topico aki.

Prome Minister a indica cu durante su biahe siman pasa el a atende reunion cu Conseho di Minister di Reino y reunionnan cu Secretario di Estado, Alexandra van Huffelen. Temanan cu a wordo trata den e dianan di bishita tabatin tin di haber cu e cambio di LAft, e ley di supervision financiero.

El a splica cu durante e reunion cu Conseho di Minister di Reino nan a yega na un palabracion cu en bes di warda te e siguiente Conseho di Minister di Reino pa duna un decision ariba e tema di cambionan den LAft, e Conseho di Minister di Reino a duna mandato na Secretario di Estado, Alexandra van Huffelen pa continua cu e dialogo den dianan aki.

Prome Minister a remarca cu e ta kere cu pa e siman aki por yega na un areglo pa asina por manda e ley aki pa Parlamento di Aruba pa trata esaki.

Reportero di Bon Dia Aruba a puntra e mandatario durante e ronda di pregunta di prensa, si coleganan di Parlamento ta di acuerdo of lo rechasa e cambionan cu Hulanda a impone pa loke ta e negociacionnan riba e tema di LAft.

Prome Minister a contesta cu ta dificil pa bisa kico Parlamento lo haci cu e ley pasobra e no a yega parlamento ainda y pa e motibo ey mes e tin “asina tanto pura pa mand’e Parlamento pa caba.”

Manera menciona caba, e palabracion cu a yega na dje den e reunion cu Conseho di Minister di Reino ta cu Aruba no mester warda e siguiente Conseho di Minister di Reino y ta haya un aprobacion di e Ministerio di Relacion di Reino y Ministerio di Finanzas di Hulanda pa asina mand’e Parlamento di Aruba.

“Unabes cu nos haya e preguntanan di Parlamento ya nos sa den ki direccion nos ta bay caba. Mi no por anticipa riba Parlamento, tin separacion di poder, nos ta gobierno nan ta Parlamento, pero p’esey mi tin asina tanto pura pa yega Parlamento pa caba. Atrobe esey ta locual a sali di e reunion cu Conseho di Minister di Reino cu mi no mester warda te fin di november cu ta e siguiente Conseho di Minister di Reino pa e ora mand’e Parlamento. Cu poder di Dios mi por mand’e mas trempan y haya sa con Parlamento ta pensa riba dje,” el a indica.

El a remarca cu ta hopi importante pa e ley bay Parlamento di Aruba pronto pasobra un di e condicionnan pa Aruba por yega na un interes mas abao ta cu e ley di LAft mester wordo cambia prome cu dia 1 di januari y e normanan mas actualisa mester wordo inclui den e ley.

El a splica cu e ley aki no a wordo cambia mas desde 2015 cu el a drenta na vigor. El a indica cu nan a purba trece cambio na esaki na 2018/2019, pero no a logra cambi’e y e normanan cu ta inclui den e ley ta ainda normanan di 2015.

El a agrega cu mientras tanto tin normanan nobo cu ta wordo aplica caba y cu, segun el a indica, Gobierno di Aruba ta teniendo su mes na dje pero mester hancra e normanan aki den e ley.

Na 2019 Gobierno di Aruba a purba convence Secretario di Estado e tempo ey, Sr. Knops pero no a logra y e ley cambia, aproba pa Staten, nunca a bin na vigor y pues pa e motibo ey mester cambia e ley aworaki.

Bon Dia Aruba a puntra Prome Minister tambe si den caso cu bin amienda no acorda cu Hulanda, si el lo retira su propuesta pa loke ta e LAft.

Prome Minister a indica cu dependiendo di kico Parlamento haci cu e ley e lo tin cu bay back na mesa cu Hulanda. “Dus si nan ta mira cu mester bin amienda lo mester bay back na mesa pa purba yega na un solucion,” el a bisa.

E mandatario a sigui splica cu durante e reunion cu Conseho di Minister di Reino a probecha pa duna un actualisacion con cos ta bayendo na Aruba, con e pais ta recuperando, recuperacion economico, turistico y finanzas publico.

El a señala cu a pesar cu e cifranan macro economico ta positivo, e progreso y bienestar den cifra, no ta tur hogar na Aruba ta sintie ainda. El a resalta cu tin demasiado hogar ainda unda e mama of tata mester traha mas cu un trabao pa por yega na e placa pa cubri gastonan fin di luna.

“Nos ta mira cu e indice di pobresa no a baha manera cu nos tabata kier pa el a baha despues di pandemia y eynan nos preocupacion ta. Nos a bisa nan nos ta bayendo bon, duna nos espacio pa nos yega den cada hogar y cada ciudadano di nos pais pa nan tambe sinti e progreso y bienestar,” Prome Minister a remarca.

Na Hulanda e mandatario a reuni tambe cu Eerste Kamer y a haci un presentacion riba e situacion actual na Aruba. El a indica cu el a ricibi hopi pregunta, preguntanan ariba e tema di reforma, e landspakket, ariba e tema financiero, e tema di rijkswet y negociacionnan cu Hulanda. Y el a remarca cu tres cos a resalta durante e reunion aki.

E prome punto cu a resalta ta cu nan tin hopi elogio pa Aruba. E di dos punto cu a bin pa dilanti, Prome Minister ta indica, ta cu algun di miembronan tampoco ta compronde e posicion di gobierno Hulandes di a duna Aruba e interes mas halto den su historia, esta di 6.9%.

El a menciona cu nan a delibera hopi riba esey tambe y mesun atardi tabatin un debate den Eerste Kamer caminda cu, specialmente parlamentarionan di e fraccion di Groenlinks, PVDA y VOLT, a trece e punto aki pa dilanti den debate. “Esey ta algo positivo pasobra nan a trece nos caso pa dilanti,” Prome Minister a subraya.

E di tres punto cu a resalta, durante e reunion aki y durante varios reunion na Hulanda, el a señala, ta cu ainda nan ta trece riba mesa e welga di hamber di aña 2014 di e Prome Minister di e tempo ey, Mike Eman.

“Ainda nan ta trece riba mesa e mal maneho financiero cu tabatin y en bes cu e gobierno di e tempo ey a carga su responsabilidad, a bay haci e welga di hamber cu a bergonsa henter Aruba y e ta un frustracion enorme cu aworaki ainda na aña 2023, ainda e punto aki ta wordo treci pa dilanti como un berguensa grandi den historia di pais Aruba,” el a enfatisa.