Ayera diaranson a tuma lugar un reunion bilateral entre prome minister di Aruba, Evelyn Wever-Croes, y minister di Relacionnan Exterior di Hulanda, Wopke Hoestra. Esaki un dia despues di reunionnan entre Aruba, Corsou, Sint Maarten y Hulanda na Corsou, unda a toca temanan general di Reino entre e premiernan di cada isla. Durante e reunion ayera a trata temanan di importancia pa Aruba.
Den un comunicado di prensa, Prome Minister Wever-Croes a duna di conoce cu Hulanda y Aruba ta riba mesun liña pa locual ta trata e tema di Venezuela. Ademas Prome Minister a remarca cu lo sigui traha pa purba yega na reapertura di e frontera, y pa yega na esey mester haci palabracionnan y condicionnan concreto cu Venezuela. Lo desea pa tin e mesun palabracionnan cu tabatin entre Aruba y Venezuela na 2018, sinembargo aworaki no tin ningun contacto entre autoridadnan di Aruba y Venezuela, pues asina e frontera no por habri.
Ta importante pa Venezuela bin na mesa pa papia di diferente punto, manera e condicionnan necesario y e control cu Venezuela ta bay efectua. Importante ta pa unabes cu habri e frontera e mester ta safe, sigur y responsabel, Prome Minister Wever-Croes enfatisa.
Otro temanan cu a trata den e reunion bilateral ta encera region, e rol di Aruba y con embahadanan di diferente paisnan por yuda den esaki, Prome Minister Wever-Croes a splica. “Hopi palabracion a wordo haci, y ta mira back na dos dia di reunion hopi intenso pero sumamente fructifero pa Aruba. E punto di relacion entre Aruba y Hulanda poco poco ta mehorando y ta mir’e tambe riba e tereno aki,” Premier Wever-Croes a termina bisando.
Di su banda, minister Hoekstra a comenta riba su pagina di Twitter cu e tabatin un bon reunion cu minister-president Wever-Croes y cu Gobernador di Aruba, Su Excelencia Alfonso Boekhoudt. “Nos a papia entre otro tocante e prioridadnan di gobierno di Aruba, e importancia di unidad y colaboracion dentro di Reino, y e consecuencianan di e guera na Ucrania riba e isla”, Hoekstra a comenta. “Mi ta gradici nan pa e medidanan cu a tuma na Aruba pa ehecuta e sancionnan contra Rusia. Ta esencial pa nos traha hunto como Reino riba esaki.”
Tocante e reunion na Corsou cu e prome ministernan di Aruba, Corsou y Sint Maarten, Wopke a comenta cu nan a papia di e rol di Reino Hulandes na Europa, Caribe, Nort America y America Latino. “Nos a papia di e guera na Ucrania y nos compromiso conhunto pa implementa y enforsa sancionnan contra Rusia”, el a bisa. “Otro topiconan importante a inclui prijs di energia y cuminda, cooperacion multilateral, cambio climatico, SIDS (Estadonan Isla Chikito den Desaroyo), e lucha contra crimen, migracion, y tambe e relacion cu Venezuela.” El a finalisa bisando cu e ta spera pa continua profundisando e cooperacion entre e cuatro pais riba politica di relacionnan exterior. “Hunto nos ta para mas fuerte.”
