Recientemente Prome Minister Evelyn Wever-Croes a bishita e club di nos grandinan cu ta situa na Piedra Plat, riba invitacion di Club Kibrahacha pa un encuentro cu e District Governor di Rotary.
Club Kibrahacha ya pa 34 aña ta brindando nos grandinan e posibilidad pa pasa nan dia den compania di otro haciendo diferente actividad pa mantene nan ocupa durante dia.
Apart di e reunion cu e District Governor di Rotary, Prome Minister a saluda nos grandinan na e centro kendenan a expresa nan alegria di saluda nos prome mandatario di pais Aruba.
Prome Minister a expresa su satisfaccion di wak e bon trabounan cu Club Kibrahacha ta haciendo pa e grupo di grandinan cu ta bishita e centro. Remarcabel ta, segun Prome Minister cu varios di nos grandinan cu tawata presente e mainta aki, ta activo riba Facebook sirbiendo tambe como un fuente di informacion di tur locual e centro ta haci pa nos grandinan y nos comunidad. Y esaki sigur hunto cu noticianan di prensa, Prome Minister a bisa, cu e ta haya ‘updates’ di e bon trabounan aki y e actividadnan di nos grandinan.
“Den nomber di Gobierno di Aruba, mi kier gradici boso pa tur loke cu boso a haci pa nos pais cu awe nos ta goberna y cu nos yiunan, nan yiunan y e siguiente generacionnan ta disfruta di dje. Dios bendiciona boso y tur esunnan cu ta haciendo e bunita trabou pa tene boso ocupa cu entretenimento y alegria”, ta palabranan bunita cu Prome Minister Evelyn Wever-Croes a dirigi na nos grandinan di Club Kibrahacha.
