Diabierna siman pasa, Vice President di Raad van State, Tom de Graaf tabata na Aruba. Señor de Graaf a tuma e oportunidad pa pasa saluda Ministernan di Gabinete Wever-Croes. Raad van State ta e instancia cu mester atende disputanan na nivel di Reino.
Prome Minister Evelyn Wever-Croes a reuni cu De Graaf y a trata temanan importante cu ta regarda Reino y Aruba. Wever-Croes a enfatisa na señor de Graaf riba e situacion financiero cu Gobierno di Aruba a hereda di un Gobierno anterior y e maneho di Gabinete Wever-Croes pa trece solucion pa pone nos pais bek riba e caminda di un finanzas publico saludabel.
Segun un comunicado di gobierno, señor Tom de Graaf a keda hopi impresiona di e logronan grandi di Aruba y con poco poco pero sigur Gobierno di Aruba ta poniendo ordo den e problemanan financiero grandi di nos pais. Esaki ta debi tambe na e sacrificio di cada ciudadano di nos pais. “Hunto nos ta logra engrandece nos pais bek y pone e ser humano central pa e progreso y prosperidad cu Aruba merece”, e comunicado ta finalisa.
