E siman aki Prome Minister Evelyn Wever – Croes a reuni cu Embahadora di Merca na Hulanda sra. Shefali Razdan Duggal kende ta na Aruba. Ta apenas algun luna cu sra. Razdan Duggal ta ocupa e funcion como embahadora di Merca na Hulanda y e kier a cera conoci cu Aruba y intercambia riba diferente tema.
Un di e temanan cu a trata ta e situacion di frontera cu Venezuela y con ta bay atende cu esey. Merca a ofrece su ayudo den esaki y a dialoga tocante esey. Un otro tema cu a trata ta recuperacion di Aruba en general, turismo, inversionnan economico y diversificacion di economia. Prome Minister Wever – Croes a splica e embahadora tocante e oportunidadnan pa Aruba diversifica riba tereno di energia, cual ta un area cu Merca ta hopi interesa pa inverti den dje. Ademas a elabora tocante e plannan di Minister Glenbert Croes y e Hydrogen Valley. Banda di esaki Prome Minister informa sra. Razdan Duggal tocante e situacion preocupante di asilo y imigracion na Aruba, y e situacion cu ta birando peligroso den awanan rond di Aruba pa loke ta droga cu ta sali di Colombia y Venezuela cu ta hopi cerca di Aruba, Aruba, Merca y Hulanda ta trahando duro pa mantene e awanan safe y lo intensiva e cooperacion.
Un otro tema importante cu a trata ta encera traficacion di hende cual lamentablemente ta mirando mas señal di dje na Aruba. Durante e reunion aki, sra. Jeanette Richardson-Baars kende ta hefe di “Coordination Center on Human Trafficking and Migrant Smuggling Aruba” (CMAA) / Mensenhandel Mensensmokkel tambe tabata presente. Prome Minister a splica cu CMAA tin hopi atencion riba e desaroyonan di traficacion di hende.
Jeanette Richardson-Baars (CMAA)
Durante e reunion sra. Richardson-Baars a splica sra. Razdan Duggal di tur e trabou cu CMAA ta haci contra di traficacion di hende, retonan cu CMAA ta confronta cu ne y kico por haci pa mehora con Aruba ta posiciona riba e tema aki. Segun sra. Richardson-Baars, a ricibi bon sugerencia di e embahadora di areanan cu por pone atencion pa yuda e comunidad Chines y Hindu cual ta un area cu Aruba no tin mucho informacion of di dje, compara cu e poblacion di Venezuela y Colombia. Ademas, sra. Razdan Duggal a ofrece pa brinda su ayudo y stimula interes riba e tema aki na Hulanda. “Semper ta bon cu un hende riba nivel internacional haci bishita y duna su aporte, sra. Richardson-Baars a enfatisa.
Pa conclui, Prome Minister a expresa cu e bishita tabata uno hopi fructifero, e reunionnan tabata hopi intenso pero hopi bon, unda cu a elabora riba e areanan di cooperacion entre Aruba y Merca.
