Diaranson 19 di maart, prome minister demisionario, Evelyn Wever-Croes, hunto cu minister di Husticia, Rocco Tjon a reuni cu Consul General di Merca pa Aruba, señor Ramon Negron, cu ta situa na Corsou.

Prome Minister ta splica cu Merca ta e pais cu ken Aruba tin e relacion mas importante pa loke ta trata nos desaroyo economico, nos turismo pero tambe pa seguridad. E consul a bin pa e celebracion di Himno y Bandera y tambe tabata presente na e recepcion na honor di tur consul na Aruba dia 17 di maart.

Migracion Venezuela
 Durante e reunion diaranson mainta a trata diferente tema, pero e principal ta e tema di Migracion, cu pa Merca ta un tema delicado y cu na Aruba ta sinti su efectonan di cerca. E situacion na Venezuela ta sigui delicado y Aruba ta hopi cerca di Venezuela y e impacto cu e migracion di Venezuela tin riba Aruba ta algo cu semper a keda bin dilanti durante reunionnan cu Merca pa asina por maneha esaki na e miho manera posibel.

Seguridad

Durante e reunion tambe a papia riba oportunidadnan economico, enseñansa y seguridad.

Aruba ta un partner importante pa Merca den mantene e region aki sigur. Aruba na varios ocasion ta intercepta contrabanda entre otro di droga y arma den awanan di Aruba. Esaki ta yuda mantene nos region mas safe evitando cu e contrabanda ta yega e destino, por ehempel Merca. Tur esaki ta haci cu Aruba y Merca tin un relacion hopi estrecho y ta importante pa mantene esaki asina.

Minister Plenipotenciario na Merca

Den desaroyonan relaciona cu e tema di cooperacion cu Merca, diaranson mainta tambe Wever-Croes a reuni cu Minister Plenipotenciario na Washington DC, señora Zulema Dabian. Durante e reunion a toca varios tema di interes general di e relacion entre Aruba y Merca, pero tambe tocante e trabounan cu señora Dabian ta haci pa pais Aruba na embahada di Reino na Washington DC.

Prome Minister a indica cu e relacion entre Aruba y Merca ta uno hopi importante, mirando cu Merca ta e partner mas importante pa nos pilar economico cu ta turismo, y pa e seguridad di nos region. Aruba su economia ta depende grandemente di Merca y hopi ta e studiantenan Arubiano cu ta bay studia eynan. E region aki ta uno instabil cu hopi desaroyo y retonan grandi y pa manten’e mas sigur y trankil e Mericanonan ta hunga un papel crucial.

E trabou di Minister Plenipotenciario na Washington DC ta hopi importante pa pais Aruba en general, pero tambe pa casonan individual, segun un comunicado di gobierno.

Mirando cu Merca tin cambio di administracion y gobierno, ta señora Dabian ta esun cu ta mantene nos informa di cualkier incidente y ta duna nos conseho con pa atende cu esakinan pa asina nos mantene e bon relacion entre Aruba y Merca.

Otro aspecto importante cu e Minister Plenipotenciario ta traha riba dje ta e acuerdonan cu e universidadnan na Merca. E acuerdonan aki ta yuda e Arubianonan cu ta bay studia na Merca pa haya e “in-state tuition”, y asina por atende e universidadnan aki pagando mescos cu un residente di Merca. Actualmente Aruba tin acuerdo cu varios scol caba na Merca, pero semper ta bon pa traha na expande esaki un poco mas.

Prome Minister a expresa di ta hopi satisfecho cu e trabou cu señora Dabian a bin ta desplegando. Mirando cu Merca tin cambio di administracion y gobierno, ta señora Dabian ta esun cu ta mantene nos informa di cualkier incidente y ta duna nos conseho con pa atende cu esakinan pa asina nos mantene e bon relacion entre Aruba y Merca.