Riba un invitacion personal pa participa como orador na ‘e-Governance Conference’ na Tallin, Estonia, Prome Minister a comparti Aruba su vision y plannan pa futuro den innovacion y digitalisacion. Alabes diamars atardi, Wever-Croes a duna un presentacion y a forma parti di den un panel di debate, na unda el a enfoca riba beneficionan di cooperacion entre paisnan chikito. E panel a wordo modera pa Hannes Astok, director di e-Governance Academy di Estonia.
Durante e panel, Prome Minister Evelyn Wever-Croes a splica mas di Aruba, di e logronan grandi di Aruba y su hendenan, y e determinacion di nos gobierno pa mehora calidad di bida di nos ciudadanonan. Pa e motibo aki tambe, ta necesario pa haci e proceduranan den gobierno mas eficiente y transparente.
Gobierno di Aruba tin un compromiso pa transforma den un Gobierno pro-activo, un e-Government, y actualmente ta finalisando un ‘Road Map’ pa defini e stapnan concreto cu mester wordo tuma den e prome fase. E Road Map cu ta den desaroyo cu ayudo di expertonan di Estonia y stakeholders local, ta incorpora diferente strategianan pa digitalisacion. Tambe lo inclui plannan di accion existente, maneho di futuro, y e vision cu lo acelera e proceso pa yega na un eGovernment.
“Un e-Government y un gobierno mas eficiente y digital lo resulta den menos burocracia, mas transparencia y un miho servicio na nos comunidad. Esaki ta puntonan cu gobierno a priorisa den e acuerdo di gobernacion ‘Hunto pa Aruba 2017-2021’” Wever-Croes a duna di conoce.
Participacion di Wever-Croes riba e tarima internacional aki lo pone Aruba riba plataforma internacional di e-Government y habri portanan pa colaboracion entre paisnan, pa por tin acceso na mas recurso y asina acelera e vision pa Aruba.
