ORANJESTAD – Despues cu gobierno di Venezuela a dicidi di cera su frontera maritimo y aereo cu nos pais, no tin mucho di bisa ainda tocante e reestablecemento di e relacion aki.
Ayera minister presidente, Evelyn Wever-Croes a revela cu tabatin un combersacion hopi cortico pero ameno cu sr. Juan Guaidó, kende a wordo nombra como presidente interino di Venezuela. E mandatario a bisa cu el a sostene un siman pasa e combersacion aki.
Nan a toca parcialmente e tema di e refineria, unda Guaidó a indica cu e refineria aki ta uno strategico den nan vision pa rescata e pais for di e decadencia economico cu nan ta aden. “Esey tabata e temanan cu mas tanto a trata. Un bon combersacion, ameno y cu ta bisa hopi den e relacion entre paisnan,” segun e mandatario. Sinembargo, Guaidó a reconoce e no tin control di full e compania ainda.
E situacion realistico di e refineria ta mustra cu cada biaha e ta birando mas dificil. “E placa no ta pasando,” asina minister presidente a revela. Esaki ta haci cu e refineria no ta hayando entrada y dificilmente e refineria no por sigui mantene e trahadonan mas den servicio, el a bisa. Ya cantidad di trahadonan a wordo retira y e situacion aki ta menasa di sigui si e refineria no ta haya fondo pa cumpli cu nan trahadonan.
Wever-Croes a declara cu e no tin mucho di bisa den e relacion politico, geopolitico di e pais bisiña aki. Segun premier Wever-Croes, Sr. Guaidó a gradici pa e sosten cu el a haya for di comunidad di Aruba y e paisnan di e region. “Nan ta sinti cu esey ta un forsa pa nan por sigui cu nan trabou.”
