(AP) — E prome investigador independiente di ONU pa bishita e centro di detencion Mericano na Guantanamo Bay a bisa ayera cu 30 homber deteni eynan ta suheto “na tratamento cruel, inhumano y degradante continuo bao ley internacional.”
E investigador, profesor di ley Irlandes, Fionnuala Ni Aolain, a bisa na un conferencia di prensa lansando su rapport di 23 pagina den Conseho di Derechonan Humano di ONU cu e atake na 2001 na New York, Washington y Penssylvania cu a mata casi 3mil persona tabata “crimen contra humanidad”. Pero el a bisa cu e uso di tortura y rendicion di Merca contra supuesto perpetrador y nan asociadonan den e añanan net despues di e atakenan, ta viola ley internacional di derechonan humano.
Ni Aolain a bisa cu su bishita ta marca e prome biaha cu un administracion Mericano ta permiti un investigador di ONU bishita e facilidad, cu a habri na 2002.
El a elogia administracion di Biden pa lidera cu ehemplo, door di habri Guantanamo y “ta prepara pa adresa e problemanan mas dificil di derechonan humano,” y a urgi otro paisnan cu a prohibi acceso di ONU na facilidadnan di detencion pa sigui e ehempel. Y el a bisa cu el a haya acceso na tur loke el a pidi, incluyendo tene reunion na e facilidad na Cuba cu detenidonan di “alto nivel” y “no alto nivel.”
Merca a bisa den un documento entrega na Conseho di Derechonan Humano riba hallazgonan di e rapport cu e hallazgonan di e investigador special “ta exclusivamente di su mes” y cu “Merca no ta di acuerdo den aspectonan significante cu hopi afirmacion y hechonan legal” den su rapport.
Ní Aoláin a bisa cu a haci “mehoracionnan significante” na e confinamento di detenidonan, pero a expresa preocupacion serio tocante e detencion continuo di 30 homber, ken el a bisa ta enfrenta inseguridad, sufrimento y ansiedad severo. El a cita ehemplonan incluyendo vigilancia casi constante, retiro for di nan cel, y uso inhusto di restriccion.
“Mi a observa cu despues di dos decada di custodia, e sufrimento di esnan detenido ta profundo, y e ta andando,” e rapporteur special di ONU riba promocion y proteccion di derechonan humano y libertadnan fundamental mientras ta combati terorismo a bisa. “Cada un detenido cu mi a conoce ta biba cu e dañonan sin fin cu ta sigui practicanan sistematico di rendicion, tortura y detencion arbitrario.”
Ni Aolain, concurentemente profesor na Universidad di Minnesota y na Queens University na Belfast, Nort Irlanda, a bisa cu pa hopi detenido, e linea entre presente y pasado “ta excepcionalmente fini” y pa algun “simplemente inexistente” pasobra “nan experiencianan den pasado di tortura ta biba cu nan den presente sin un fin obvio na bista, incluyendo pasobra nan no a ricibi ningun rehabilitacion adecua pa tortura te awo.”
El a haci un serie largo di recomendacion y a bisa cu mester cera e prison na Guantanamo Bay.
E respuesta di Merca, entrega pa embahador Mericano na e Conseho di Derechonan Humano, Michele Taylor, a bisa cu a duna Ni Aolain “acceso sin precedente” cu “e confiansa cu e condicionnan di detencion na Guantanamo Bay ta humano y ta refleha e respet di Merca y proteccion di derechonan humano pa tur cu ta den nos custodia.” El a agrega cu e detenidonan “ta biba comunalmente y ta prepara cuminda hunto; ta ricibi cuido psikiatrico y medico specialisa; ta ricibi acceso completo na terapia; y ta comunica regularmente cu miembronan di famia, segun e declaracion Mericano. Asina mes, a bisa cu ta revisando cuidadosamente e recomendacionnan y ta bay tuma cualkier accion apropia segun ta necesario.
Merca a bisa cu administracion di Biden a haci “progreso significante” pa cera Guantanamo, transferiendo 10 detenido for di e facilidad, a bisa, agregando cu ta buscando sitionan adecua pa e resto di e detenidonan eligible pa transferencia. Pa esnan no eligible, “ta haci revisionnan periodico pa determina si detencion continuo bao ley tin base,” mientras e proceso pa detenidonan suheto na acusacionnan criminal ta continua den comisionnan militar.
