Institucionnan fuerte ademas di economia habri ta haci Aruba atractivo pa inversionista internacional

Aunke Aruba a score mihor den e indice di rango economico pa region di Caribe, e pais tin su debilidad cu ta debe di gobierno y disponibilidad di data. Asina Caribbean Investment Climate Index, CICI a publica. En cambio, e di dos pais riba e rango, Bahamas, tin un averahe halto y promedio pa tur area analisa y no tin debilidad, segun e rango.

CICI ta consisti di Sjoerd Boerdijk, consulente na Economisch Bureau Amsterdam, Koert van Buiren, cu ta partner na Economisch Bureau Amsterdam ademas di docente na Universidad di Amsterdam, y Matthijs Gerritsen, cu ta partner asocia di Economisch Bureau Amsterdam. Aunke cu e balor di indice economico pa esnan cu ta tuma decision ta halto, e funcionalidad di indicenan economico den Caribe ta hopi limita, particularmente pasobra ta analisa unicamente algun pais. Indice economico renombra ta e Doing Business Index di Banco Mundial, Global Competitiveness Index di Foro Economico Mundial y e Financial Development Index di IMF. Exito y popularidad di e indicenan aki tin di haci cu, na promer lugar, nan simplicidad. St. Maarten, Corsou y Aruba no ta aparece den e indicenan menciona, cu excepcion di e Financial Development Index den cual Aruba si ta aparece.

Inversion internacional ta necesario

E escala chikito di economia, accesilibilidad limita na capital internacional y dependencia riba importacion di hopi pais den Caribe, ta haci cu atrae inversionista internacional ta hopi importante, pa no bisa necesario. Paisnan den Caribe tin diferente areglo atractivo pa inversionista internacional, manera e facilidad di e asina yama ‘taxholiday,’ y e dunamento di garantianan. Hasta tin pais cu ta ofrece nan ciudadania na inversionista riba un cierto suma. Pero areglonan asina ta costa hopi y ta pisa riba finanzas publico.

Cu e CICI ta midi e atractivo di e clima di inversion di paisnan den region. A haci e analisis basa riba cifranan prome cu e crisis di corona. Lo actualisa esaki unavez cu consecuencianan di e pandemia di COVID-19 lo bira mas bisto.

Factornan cu a midi

A traha un indice di 17 pais, cu ta inclui e tres paisnan autonomo di Reino Hulandes den Caribe. E score di CICI ta consisti di indicadornan institucional y economico cu tin influencia riba e clima di inversion, ademas di 19 variabel cu ta determina e resultado final. Nan tin di haber cu e fortalesa di institucionnan, crecemento di bienestar, con habri economia ta, e clima di empresario y disponibilidad di data. No tur e variabelnan aki ta pisa mesun hopi. Crecemento economico, un economia habri, e facilidad pa haci negoshi y e institucionnan tin un peso halto. Crecemento di poblacion, grado di participacion y e debe di Gobierno di otro banda tin un peso menos grandi.

Dato ta importante

CICI a evalua unicamente e variabelnan di cual tin suficiente dato disponibel. Unda cu tin limite di informacion, ta kita di e evaluacion final. No a duna un evaluacion of un rango na paisnan cu no por brinda un minimo di 50 porciento di e indicadornan necesario y a laga nan afo. Y despues, a determina pa laga e produccion di e resultadonan keda determina segun nan peso

Aruba, y Corsou den un grado menor, tin un clima di inversion atractivo den perspectiva di Caribe. Corsou ta na di cinco (5) lugar den e indice CICI.

Debe publico halto ta stroba inversion

Esaki tin di haci pa gran parti cu e economia habri, e nivel di bienestar y e fortaleza di su institucionnan (entre otro sistema hudicial). E factornan aki a contribui na e score relativamente halto di tanto Corsou y Aruba. E debe halto di Gobierno di Aruba di otro banda ta un negativo pa inversion. E debe aki ta reprimi inversion priva y tambe inversionnan publico productivo manera den enseñansa. E crecemento economico abou di Corsou, ademas di e grado di participacion ta afecta e clima di inversion di e pais ruman den forma negativo.

Pa ambos ta conta cu e disponibilidad di dato ta limita. Es mas, e disponibilidad di dato na St. Maarten ta asina abao cu no por a calcula e score riba e rango di CICI. Segun Boerdijk, van Buiren y Gerritsen, mihor disponibilidad di dato ta esencial pa decision riba maneho y pa por midi e resultadonan di e programanan di reforma describi den e landspakketnan, cu mester keda implementa den e proximo añanan.

Otro paisnan cu a cay den e indice di CICI ta Grenada na di tres lugar, Saint Lucia na di cuatro. Puerto Rico ta na di siete lugar y Barbados ta na di 11. Cuba ta na di 16 lugar y Haiti ta na di 17. Pero manera a mustra caba, no a inclui St. Maarten y otro pais pa falta di dato.