Na e prome hospital di olifanti na India, cual a habri den estado di Uttar Pradesh, Asha, di 49 aña di edad, a pone su pia riba un stoel pa un dokter atende un herida, mientras bishitantenan tabata film tur cos cu nan celular.
E facilidad, cu ta conta cu entre otro, x-ray digital wireless, imagen termal, ultrasonografia, aparatonan di trankilisacion y facilidad di cuarentena, no unicamente ta yega como un alivio pa e olifantinan, sino tambe ta atrayendo turista local y stranhero.
Olifanti ta un parti importante di cultura di India, y ta presenta prominentemente den festivalnan y procesionnan den sur di e pais. Ademas nan ta uza como atraccion turistico na varios fort y palacio den region nort y west.
E hospital ta plama riba 12,000ft2 y ta diseña pa trata olifanti herida, cu enfermedad, of geriatrico. “Mi ta kere door di construi un hospital nos ta subrayando e hecho cu olifantinan mester medida di cuido tanto como otro animal”, Geeta Seshamani, co- fundado di Wildlife SOS, e non- profit tras di e hospital, a bisa. “Cu olifanti no mester wordo uza y abusa, sino mester ricibi e respet cu un animal merece si bo ta bay haci uzo di dje.”
Mientras olifanti ta venera como simbolo religioso y cultural di India, tambe nan ta maltrata pa nan mahouts sin educacion, y hopi biaha ta bira victima di electrocucion, poaching, accidente di trein y envenenamento, segun activistanan pa derecho di animal ta bisa.
Poblacion di olifanti di India a cay na 27,312 na 2017 for di 29,391 na 2012, segun data di gobierno. Centenares di olifanti rond India, cu ta conta cu mas di mita di poblacion di olifanti na Asia, ta wordo teni den captividad y hinca usualmente cu gancho di metal pa subordina nan.
E hospital ta cerca di un centro di conservacion y cuido di olifanti di Wildlife SOS, cu ta cas di 22 olifanti.
