Cu vuelo 765 di KLM a yega awe 30 di juli e prome grupo di studiante Arubano pa sigui un estudio avansa na nivel di HBO of Universidad na Hulanda. Un total di 24 studiante a yega y lo bay studia na e ciudadnan di Tilburg y Eindhoven. Diaranson 2 di augustus e di dos grupo y tambe esun mas grandi lo bin Hulanda.

Na Schiphol e studiantenan mescos cu tur aña a wordo saluda pa Minister Plenipotenciario mr. Ady Thijsen y director a.i. di Arubahuis drs. Glenda Hernandez. Un biaha mas tabata tin un delegacion consistiendo di funcionarionan di Departamento di Enseñansa di Arubahuis, studiementor y miembronan di e POC (Plaatselijke Opvangcommissie) presente den sala di yegada di Schiphol.

Mester bisa cu e grupo di studiante a sali basta lihe cu nan maleta. Akinan na un forma bon coordina y organisa a haya instruccion di personal di Arubahuis, mentor y miembronan di e POC con pa cana y unda nan mester a para den grupo pa warda nan turno pa bay na e bus cu lo hiba nan Tilburg of Eindhoven.

Na Schiphol tabata tin un camara man di e programa Leu fo’i Cas pa graba e yegada y haci algun entrevista cu e studiantenan. Roy Kelly di e website Arubiano.eu tambe a saca potret di e studiantenan.

Awe dialuna e grupo di studiantenan aki lo cuminsa cu e programa di “opvang” obligatorio, cual lo dura entre tres dia y un siman. Durante e dianan aki e studiantenan nobo lo haya e guia necesario den nan ciudad unda pa sigur cuater aña of mas nan lo biba y studia.

E prome aña e studiante ta ricibi guia di e studiementor, pero pa e resto di su estudio e ta cay bou di Arubahuis.

Mensahe di Prome Minister, Evelyn Wever-Croes

“Ohala cu pronto boso por termina boso estudio y bin back Aruba y yuda nos sigui desaroya nos economia,” Wever-Croes a post den un video riba su pagina di Facebook, hunto cu e siguiente mensahe:

Un otro aña escolar ta tras di lomba y na e momentonan aki, studiantenan cu a caba scol aki na Aruba ta preparando pa bay sigui nan estudio den exterior. Momentonan cu hopi emocion tanto pa e studiante pero sigur tambe pa e famia. Ya caba e prome grupo di studiante a yega Hulanda y a wordo ricibi pa Minister Plenipotenciario mr. Ady Thijsen y director a.i. di Arubahuis drs. Glenda Hernandez. Tambe tabata presente representantenan di Departamento di Enseñansa di Arubahuis, studiementor y miembronan di e Plaatselijke Opvangcommissie (POC).

Prome Minister Evelyn Wever-Croes ta desea tur studiante cu a bay y ta bayendo exterior pa sigui nan estudio, exito den e caminda cu nan a scoge pa un futuro briyante nan dilanti. “Mi ta desea tur studiante cu a bay y ta bayendo exterior den e proximo dianan pa sigui nan estudio, hopi exito. Mi ta encurasha cada un di boso pa boso nunca lubida cu unda cu boso bay, boso ta un embahador di Aruba. Semper laga atras un bon impresion di Aruba. Tene cuenta cu no ta tur ora cos ta bay manera planifica. Pero semper keda enfoca riba boso meta y keda semper positivo, irespecto kico pasa. Percura pa boso logra locual boso a bay haci den exterior. Ohala cu pronto boso por termina boso estudio y bin bek Aruba y yuda nos sigui desaroya nos economia. Hopi exito den boso estudio y cu Dios bendiciona boso”.

Na mayornan, Prome Minister a encurasha, pa nan ta fuerte den e fase aki cu nan yiu ta encamina den nan bida. “Esaki ta e momentonan talbes mas duro cu sigur bida no ta prepara ningun mayor p’e. pero esaki ta e momento cu nos mester habri nos brasanan, habri hala y laga nos yiunan bay pa nan soño, biba riba nan mes den un pais straño. Sinembargo, nos mester confia cu e fundeshi di norma y balornan cu nos a duna nan, lo guia nan pa nan tuma e miho decisionnan ora nan ta riba nan mes den exterior. Hopi forsa y ban permiti nos hobennan pa nan ta riba nan mes y desaroya nan mes.”