E siman aki, presidente di Camara di Comercio y Industria di Aruba (KvK), Ernst Mohamed y e directora di gremio aki, Sonja Velthuizen a oficialisa e apertura di e di cuater curso di empresario independiente chikito y mediado 2017. E biaha aki, sra. Velthuizen a anuncia cu e cursistanan cu ta gradua nan ta bin na remarca pa un financiamento di Krediet Aruba.

“Esaki kiermen cu bo por cuminsa cu bo negoshi di biaha si bo kier…”, el a bisa. E anuncio aki a cay den bon tera cerca e participantenan, ya cu e bottle neck principal cu e empresario nobo ta confronta pa habri un negoshi ta e falta di financiamento.

Sra. Velthuizen a laga sa cu esaki ta e di cuater grupo cu ta sigui e curso aki durante 2017. El a haya cu e grupo aki ta gosa di bon suerte, pasobra nan ta bay traha un business plan cu nan lo presenta dilanti un hurado cu ta inclui un representante di Krediet Aruba.

KvK a purba di facilita e proceso aki pa basta tempo. E biaha aki e prome grupo di empresario nobo lo wordo facilita e acceso pa haya financiamento pa inicia nan propio negoshi. El a laga sa cu KvK ta porta habri pa yuda nan y atende cu nan inkietudnan y preguntanan, gewoon nan tin cu tuma contacto cu KvK libremente.

El a bisa cu pa e cursistanan durante e dianan aki KvK ta bira nan segundo cas. Durante dos siman nan lo atende e diferente presentacion pa duna contenido na e curso di empresario independiente chikito y mediado. Nan ta bay haya conocemento riba tereno di financia, marketing, sales, servicionan na cliente, legislacion, etc.. “Tur cos cu ta di importancia pa lanta un negoshi”, el a bisa. El a bisa cu ta spera di topa e grupo aki di empresario nobo atrobe na luna di juli 2018, durante entrega di certificadonan.

Preparacion
Ex secretario di KvK, Leo Maduro y tambe Dave Martinus di Action Coach tabata un di e oradonan invita pa haci nan presentacion den e curso. Sr. Maduro a papia riba aspecto di inscripcion y asociacion na KvK. Mientras cu sr. Martinus a papia riba diferente aspecto cu un empresario nobo mester tene na cuenta.

Sr. Martinus ta haya cu ta importante pa sigui incentiva e hendenan cu kier lanta un negoshi pa sigui e tipo di curso aki. Pasobra un punto importante cu un persona tin na cuenta ora cu ta lanta su negoshi no ta solamente tin e conocemento di kico e ta bay haci. Pero logicamente pa e sa kico ta tur e procesonan, practicanan, fayonan cu e ta bay topa den su caminda ora cu e ta cuminsa un negoshi.

“E curso aki ta cu intencion pa manera cu nan ta start nan por start bon un solo biaha”, el a bisa.

Durante añanan nan ta ripara cu hopi negoshi cu ta habri den corto tempo nan ta cera, simplemente pasobra no tin e bon preparacion pa loke nan ta wordo expone na dje den practica. E tipo di comerciante di antes cu tabata wordo forma a base di nan propio experiencia awendia ta cuestion di pasado. E ta haya cu propio experiencia por, pero hopi biaha ta dura 20 aña prome cu bo ta realisa tur e fayonan cu di antemano bo por evita pa medio di e tipo di curso aki.

“Den e caso aki simplemente educacion ta facilita y acelera e proceso di exito”, el a bisa.

Sr. Martinus a bisa cu mayoria di e participantenan di e curso aki ta bin cu e meta pa habri diferente negoshinan. Esaki ta un aspecto interesante pa wak, pasobra nan ta haya cu cierto problema tin di haber cu nan tipo di negoshi so, pero ta resulta cu tin biaha no ta asina. E experiencia cu e participantenan ta pasa pa medio di e curso aki ta cu a pesar cu tin diferente tipo di negoshi, toch tur ta comparti algun similaridad cu nan ta siña fei dje durante e parti practico di e curso aki.